بطاطين من فينيسيا

-


ذكرياتي 79
كان من المستحيل ان مامتي تطلعني رحلة لان انا كنت مرووشة زي ما كانت بتقول لي ومرووشة زمان مش زي روشة دلوقتي ابسلوتلي بالعكس معناها ان انا مش مركزة و كل حاجة ممكن تبوظ مني وانا كنت كدة بحقيقي ودي من علامات عبقريتي الفزة
يعني مثلا مش ممكن افكر في ابعاد اي حاجة قبل ما اعملها ، مثلا ممكن احب اركب العربية و ما اقفلش الباب اللي لما تمشي علشان اشوف الرصيف وهو بيتحرك ، ممكن اسيب كل اللي في ايدي مهما كان مهم ومهما كان غالي لاني لازم اجري بسرعة علشان ادخل اوضتي اول واحدة قبل اخواتي
ممكن تقع مني الكوباية علشان لازم المس اخويا وهو ماشي لانه لمسني قبل الاكل و لازم اكون آخر واحدة لمست
في النهاية مامتي وافقت وانا في بكالوريوس ان انا اسافر في رحلة وهي رحلة في مركب عبارة حتروح ايطاليا و اليونان ووافقت لانها مع واحدة صاحبتي من النوع الراكز التقيل اللي عمري ما شفتها بتهزر اساسا والصراحة ولا بتتكلم من اصلة ، هي سايبالي الموضوع ده انا ادوس فيه براحتي
الرحلة دي قامت من اسكندرية و نتيجة خبرتهم السابقة لي في موضوع المادة ما رضيتش مامتي تديني فلوس كتير لان انا ممكن اجيب بيهم كلهم كوتشينة علشان عجبتني مثلا
طلعنا المركب انا وصاحبتي و اخوها و اتعرفت على واحدة تانية و اخوها وكنا بقى نظام متوصي علينا وقاعدين درجة اولى ممتازة وكل اللي معانا ناس تمام التمام منهم والله والله صفوت الشريف ، بس على مين انا مش اساسا ما بعرفهمش من بعض و كلهم مهمين.
في الرحلة دي كنت طالعة معايا فلوس علشان اشتري شوية لبس حلوين و اتفسح ولان مامتي عارفة ان انا ممكن اضيع الفلوس زي زمان فقالت لي
- هاتيلي بطاطين
- نعم
- بطاطين
- نعم
- بتشاتشييييين
- حاضر
رحت في المركب وهي فول بورد وفضلت مش عايزة اصرف مليم ، ما انا مش عارفة البطاطين بكام الايام دي
المهم وصلنا فينيسا و انا بقى اللي بافهم طلياني فيهم و بقيت اوديهم لمحطة القطار ونوصل لفينيسيا واحنا في المحطة قلت لاصحابي
تيجو نتكلم عربي ونستخدم الحروف الصعبة علشان نعقد الناس في القطار
قعدنا نتكلم ولقينا ان كلامنا سهل فقلتهم
قطع ، ردوا ضغق ، وهاتك يا قاف و عين و غين لغاية لما وصلنا
هناك لقينا فيه محل جزم حاطط برة شباشب و صنادل و دخلنا فلقيت اخو صاحبتي بيقول لي تعالي لحسن الست البياعة الغبية بتسألني حاشتري الفردتين و الا فردة واحدة من الشبشب
استغربت جدا لان ازاي واحد يشتري فردة شبشب واحدة
رحت لقيت البياعة ماسكة الشبشب اللي جايبة و بتقول لي
هو جايب فردتين يمين
هو عايز الفردتين الشمال بتوعهم و الا عايزة شبشب واحد بس
وطبعا ضحكنا للصبح على سوء التفاهم
اكمل الرحلة بعدين

تعليقات

إرسال تعليق

المشاركات الشائعة من هذه المدونة

مين عايز شكولاته الا كوكا

-
انا طول عمري باحب اخواتي زي عيوني اختي الكبيرة مثل اعلى احب ابقى زيه بنت ناس بصحيح اخويا الكبير ده لوحدة حتة من الجنة سعادتي كلها وانا معاه اخويا الصغير حنية الدنيا فيه كله عاطفة وباشعر معاه بالامان ولكن اخويا الصغير كان دايما بيزعل مني زي ما ناس كتير ممكن تزعل مني من غير قصد وانا لما كنت ازعل منه ساعات افتكر وساعات لما انام تاني يوم انسى كان لما يزعلني بعد الظهر وانا اتنطط من الزعل واقوله مخاصماااااك عمرك ما تكلمني تاني ابدا ويعدي بعد الظهر وانا مكشرة وانام بعد النوم الجميل والساعات المريحة اصحى تاني يوم واقوله صباح الخير ما يردش صبااااااح الخير يا جميل ما يردش فيه ايه يبص لي ويقول لي مش انتي مخصماني احاول افتكر هو كان عمل ايه مزعلني ويدخل يغسل وشه وانا سرحانه في السقف هو كان زعق والا اخد مني حاجة ما رجعهاش والا يمكن كسر لي لعبة المهم بعد المدة الطويلة والسرحانة الاقي نفسي مش فاكرة اقول له خلاص انا مش مخصماك صباح الخير ما يردش اقول له فيه ايه يقول لي انتي صالحتيني لكن انا مش مصالحك ليه يا عم فيه ايه اهو كدة انا مش مصالحك الله اذا كان انا اللي زعلانة اهو ...
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب...
قراءة المزيد

يامرايتي يا مرايتي

-
يامرايتي يا مرايتي مين اجمل واحدة في الدنيا دي اللي قالته الملكة ولما المراية قالتلها سنو وايت و بياض الثلج قررت قتلها فيه ناس مش بتشوف نفسها في المراية لكن بتشوف المراية تقول لها ايه فيه كتير من الناس بتستنى تشوف الناس تقول لها ايه عن نفسها وتعتمد على الكلام ده في انها تشوف نفسها اعرف بنت صغيرة المدرسة كانت بتتكلم عن التميز في الشكل واشارت الى حجم انف الفتاة انها تتميز بانف كبيرة والله اعلم ان انفها جميل ومتناسق مع وجهها وان تلك الفتاة كانت جميلة ولكن هذا الوصف حول في حي اة الطفلة وافقدها الكثير من الثقة في النفس . ياريت نشوف نفسنا في المراية زي ما ربنا خلقنا نشوف انسان جميل سجد له الملائكة وغضب الله على ابليس لانه لم يسجد له نشوف خلق الله الجميل اللي مهما شعرنا ان فيه عيوب لكنها مش عيوب ده تميز نشوف قلبنا قبل وجهنا مفيش داعي تعتمد على رؤية الناس لك علشان تعرف انت مين لازم تعتمد على رؤيتك ولو شفت حاجة مش عاجباك حليها باخلاقك وعطفك وحنيتك صباحكم زي الفل والياسمين
قراءة المزيد