يجب التمهيد لوجود برص في البيت

-
انا ام مثالية
ده موضوع مش بنتناقش فيه ده بنعرفه
وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي
مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي
الله ياولاد شفتم ده برص
الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه
بعد شوية سمعت بنتي بتقول كوتي كوتي كوتي
لقيتها عماله تدلع البرص وتخبط من جوه على رجلية
تصدقوا اني مقشعرة وانا باكتب
قلتلها سيبكم من البرص وتعالوا عشان نفضي الشنط
مرت سنوات واحنا في عمان وكان البرص دايما واقف برة البيت مستني فرصة يدخل ولكن على مين يا بابا احنا مفتحين قوي
تمر الايام واللي يقول لنا اوعوا تسيبوا ملح مفتوح واللي يقول لنا البرص مش بيحب كلمة محمد فلازم تبلغوه ان صاحب البيت اسمه محمد
ومرة خرجنا واحنا راجعين لقيت ابني محمد واقف بيتكلم مع البرص من القلب للقلب وبيبلغه انه اسفا اسمه محمد وانه ابن صاحب البيت وانه مش حيقدر يدخل للاسف لانه هو كمحمد مش حيسمحله
تمر الايام واسيب جوزي في الصيف لزيارة العائلة واعود لالقيه كان بيقفل التكييف المركزي فالبرص استخدم الممرات بتاعة الهواء للدخول الى داخل البيت وجوزي قالي انا شفت برص بس مش عارف هو فين
عدا علي كام يوم وتربست على الملح وتقريبا كنت بافتح كيس في اليوم وارمي الباقي من خوفي من وجود هذا الزائر للبيت وفي ليلة من تلك الليالي ويوم من هؤلاء الايام كنت طالعة حجرة النوم في ساعة عصرية وجوزي والاولاد تحت هو نايم على الكنبة وهم بيلعبوا قدامه زي اي عائلة مصرية سعيدة والاقي البرص افندي واقف على السلم بين درجتين بنفس الرخامة بتاعته
وبما اننا كنت باشوفه كدة بالساعات فقلت انزل انادي جوزي عشان يموته وبما اني زي ما قلتلكم وانتم اكيد فاكرين اني ام مثالية فكان لازم ابلغه من غير ما اعمل قلق وخوف فرحت لجوزي وهو نايم وطبطبت على كتفه وقلتله برص وبهدوء شديد قلتله ممكن تصحى عشان فيه برص
جوزي قام بهدوء من النوم ومشي بالراحة وطلع على السلم حبة حبة ولما وصل للسلمة اياها قالي اطلعي اقفلي الابواب
نعم
اقفلي ابواب الاوض فوق
نطيت من فوقه ورحت قفلت ابواب الاوض
ايوة قالي انزلي هاتيلي شبشب
اتاريه طالع من غير شبشب
رحت بسرعة جبت شبشب فمسك الشبشب ومال الى الامام ليدرس الموقعة واول ما مسك الشبشب في لحظة جري البرص بسرعة واختفى في حجرة بنتي
ياخرااااابي
البرص اختفى
ايه اللي حصل بصيت لجوزي وقلتله انت اتاخرت كدة ليه ما قتلتوش على طول ليه
قال لي
غلطتك انتي ما حفزتنيش كويس
نعم
ايوة ما حفز تنيش كويس انا عمري ما شفت ست تشوف برص وتيجي لجوزها بمنتهى الحنية وتقول له بووووورس
كان لازم تجري وتصرخي وتخافي وتتخضي قوم انا اتحقفز واجري جري اموته في ثانية
يعني في الآخر طلعت ام مثالية لكن زوجة بتتدلع
طيب وحياة الايام الجميلة اللي بينا لو لقيت برص لألم عليه سحالي البلد كلها
مش حاقول الطريقة اللي عشنا فيها وهي ان كل ابواب البيت مليانة قطن بديتول عشان نخنقه ايا ماكان وجاء اليوم الموعود
دخلت اوضتي ولقيت الباشا البرص على الارض وبما انه خداع وبيجري فضلت واقفة قدامه وبانادي باعلى صوتي
بوووووووووووووووووووووووووووووورص الحقوني ي ي ي ي ي ي ي ي بووووووووررررررررررررص
وباعلى صوتي ولقيت جوزي واولادي وشباشب وفليت وماسكات ومدافع واستنيت ان جوزي يضربه ويخلصنا
لقيت جوزي بيقولي شيلي الغطيان و المرتبة
نعم
عاد الامر مرة اخرى
شيييلي المرتبة والغطيان
رحت شيلت المرتبة والغطيان وجوزي في حالة تأهب كاملة واكيد البرص جري وانا باشيل المرتبة لانه في نص الاوضة وما اقدرش استسمحه الاول وجري فين ياترى
في الدولاب
راح جوزي فاتح الدولاب
لقى الدولاب ماليان هدوم وشنط واكياس وكل اللي الناس بتجيبه في الاعارة
من غير ما يبص لي قالي
فضي الدولاب
نعم
كل الدولاب
ايوة فضي الدولاب عشان اشوف البرص
ووقف في وضع استعداد برة الدولاب

وانا باشيل ال الهدوم الاول وبعدين الاكياس وبعدين وانا باشيل الجزم جري البرص ناحية جوزي
ولقيت جوزي ماسك جزمة رجالي وزنها بتاعة 2 كيلو وهات يا ضرب ضرب ضرب ضرب ضرب
البرص تحول الي ورقة بفرة لازقة على الموكيت
لسة جوزي مالوش دعوة
ضرب ضرب ضرب
وانا باقوله كفاية كفاية
والاولاد خلاص مات يا دادي ماااات
وهو يضرب يضرب لغاية لما صرخت
خلاااااااااااااااص انت قتلته انتهى
قام سكت وفاق وبص لنا كلنا
وبص للبرص في الارض
وقال لي
شيليه واعمليلي شاي
اولادي من يومها مش بيخافوا من البرص
بيخافوا من ابوهم موت

تعليقات

  1. Unknown14 يونيو 2018 في 12:32 م

    أزال أحد مشرفي المدونة هذا التعليق.

    ردحذف
  2. nada.mixseogy3 يونيو 2020 في 1:52 م

    أزال أحد مشرفي المدونة هذا التعليق.

    ردحذف
  3. shekooop654 يونيو 2020 في 11:40 ص

    أزال أحد مشرفي المدونة هذا التعليق.

    ردحذف

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد