في المدرسة مش لازم تحلم

-


ذكرياتي 80
اليوم اول يوم في مدرسة جديدة وانا بالضبط غيرت بتاع 11 مدرسة من الحضانة للثانوي لما بقيت لما ادخل المدرسة ابص حواليا و اقعد بتاع اسبوعين مستكنة في مكاني و بادرس الموقعة وكلها شوية و ابتجي النشاط الغير عادي بتاعي وهو عبارة عن حركة مستمرة و معاكسة للكل و نكتة اليوم وعملت ايه امبارح و حاشوف مين النهاردة وانا متأكدة من ان كل واحد قعد معايا شوية في اي وقت في حياتي حيكون عرف كل حاجة حوالي من اول ماما بتحب تاكل ايه لغاية انا اتخانقت امتى مع البواب وياريت ما ننساش طنط انجيل جارتنا كمان
في مدرسة من المدارس في طرابلس الغرب او عاصمة ليبيا ووالدي كان مستشار النائب العام و رئيس نيابة المحكمة العليا و حاجة ابهة وانا بقى ليا وضع و محدش يدوس لي على طرف بقى ولكن مفيش مانع ان شطارتي مساهمة في الموضوع وكنت باذاكر كويس ولكن في ليبيا الصراحة كنت باجيب نمر اسهل من مصر كتير لان البنات هناك مش بيموتوا نفسهم في المذاكرة زي مصر واهاليهم مش بتزعل لما ما يجيبوش نمر زي مصر
في ليبيا لو حلمت بالرسول عليه الصلاة و السلام فمن المطلوب انك تمتنع عن الكلام لمدة 3 ايام وانا لغاية دلوقتي مش عارفة السبب ولكن ده موروث عندهم من زمان و علشان كدة كنت لما يكون عندنا حصة نصوص في اللغة العربية وكلها حفظ وانا في الحفظ سيئة جدا جدا جدا جدا ، وحل تلك المشكلة ان يوم التسميع اصوم عن الكلام كاني شفت الرسول عليه الصلاة والسلام في المنام وبعد حصة النصوص اعيش حياتي عادي وطبعا كررت الموضوع لما باظ مني و اصبح المدرس يقف قدامي و يقول لي سمعي النص وانا اشاور والبنات تقول دي صايمة عن الكلام وهو يقول افطري وتنتهي ان منظري يبقى مش حلو واضطريت ان كل حصة نصوص افعد قبل الحصة ماسكة اول البيوت بتوع الشعر علشان اعرف اكمل عليهم
انا لغاية دلوقتي ما حلمتش ولا مرة بسيدنا محمد ونفسي تحصل لي مرة واحدة في حياتي واصوم عن الكلام بصحيح

تعليقات

إرسال تعليق

المشاركات الشائعة من هذه المدونة

مين عايز شكولاته الا كوكا

-
انا طول عمري باحب اخواتي زي عيوني اختي الكبيرة مثل اعلى احب ابقى زيه بنت ناس بصحيح اخويا الكبير ده لوحدة حتة من الجنة سعادتي كلها وانا معاه اخويا الصغير حنية الدنيا فيه كله عاطفة وباشعر معاه بالامان ولكن اخويا الصغير كان دايما بيزعل مني زي ما ناس كتير ممكن تزعل مني من غير قصد وانا لما كنت ازعل منه ساعات افتكر وساعات لما انام تاني يوم انسى كان لما يزعلني بعد الظهر وانا اتنطط من الزعل واقوله مخاصماااااك عمرك ما تكلمني تاني ابدا ويعدي بعد الظهر وانا مكشرة وانام بعد النوم الجميل والساعات المريحة اصحى تاني يوم واقوله صباح الخير ما يردش صبااااااح الخير يا جميل ما يردش فيه ايه يبص لي ويقول لي مش انتي مخصماني احاول افتكر هو كان عمل ايه مزعلني ويدخل يغسل وشه وانا سرحانه في السقف هو كان زعق والا اخد مني حاجة ما رجعهاش والا يمكن كسر لي لعبة المهم بعد المدة الطويلة والسرحانة الاقي نفسي مش فاكرة اقول له خلاص انا مش مخصماك صباح الخير ما يردش اقول له فيه ايه يقول لي انتي صالحتيني لكن انا مش مصالحك ليه يا عم فيه ايه اهو كدة انا مش مصالحك الله اذا كان انا اللي زعلانة اهو ...
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب...
قراءة المزيد

يامرايتي يا مرايتي

-
يامرايتي يا مرايتي مين اجمل واحدة في الدنيا دي اللي قالته الملكة ولما المراية قالتلها سنو وايت و بياض الثلج قررت قتلها فيه ناس مش بتشوف نفسها في المراية لكن بتشوف المراية تقول لها ايه فيه كتير من الناس بتستنى تشوف الناس تقول لها ايه عن نفسها وتعتمد على الكلام ده في انها تشوف نفسها اعرف بنت صغيرة المدرسة كانت بتتكلم عن التميز في الشكل واشارت الى حجم انف الفتاة انها تتميز بانف كبيرة والله اعلم ان انفها جميل ومتناسق مع وجهها وان تلك الفتاة كانت جميلة ولكن هذا الوصف حول في حي اة الطفلة وافقدها الكثير من الثقة في النفس . ياريت نشوف نفسنا في المراية زي ما ربنا خلقنا نشوف انسان جميل سجد له الملائكة وغضب الله على ابليس لانه لم يسجد له نشوف خلق الله الجميل اللي مهما شعرنا ان فيه عيوب لكنها مش عيوب ده تميز نشوف قلبنا قبل وجهنا مفيش داعي تعتمد على رؤية الناس لك علشان تعرف انت مين لازم تعتمد على رؤيتك ولو شفت حاجة مش عاجباك حليها باخلاقك وعطفك وحنيتك صباحكم زي الفل والياسمين
قراءة المزيد