طقوس ورق العنب

ذكرياتي 70
ورق العنب في كل بيت و لكن عندنا كان له طقوس تانية
كان فيه ترابيزة مخصوص لورق العنب
و صينية مخصوص عليها حلة مخصوصة و طبق مخصوص يتحط عليه الورق ومكان مخصوص في البلكونة ماما تقعد و الشغالة تحضر لها كل المكونات و تبتدي ماما تحضر ورق العنب
وانا الصراحة كان نفسي اتجوز و يبقى لي بلكونة زي بتاعة ماما علشان اقعد عليها و احشي المحشي و شكل السائل اللي بينزل من الارز وهو بيتحط على المحشي اللي في الحلة يخليكي عايزة تاكليه ني
المهم ان انا كنت مخطوبة و كنت مستية خطيبي حيفوت علي و بلكونة مامتي على طريق الحرية وبالتالي انا قلت استناه في البلكونة لما يجي اشوف العربية و انزل على طول لان زمان مكانش فيه موبايلات و ارنلك و ايبلك ميسد و حاجات من دي
قعدت اتفرج على ماما و هي بتحشي بمزاج شديد و ترص الواحدة فوق التانية فقلت اجرب اعمل معاها لان كان فاضل بتاع نصف ساعة و انا نفسي اعمل واحدة و كانت دي اول مرة اتجرأ فيها واحاول اعمل معاها
"ممكن اعمل معاكي لغاية لما انزل ؟"
طبعا يا حبيبتي بس اغسلي ايدك وتعالي
قعدت قدامها و مسكت ورقة العنب و بدأت احشي
وخلصت اول واحدة و لقيت ان ماما مش بتبص على الحلة ، لااا دي بتبص علي وانا باحشي
وفجأة لقيتها بتقول لي
ايه اللي بتعمليه ده
احشي كدة وريني
طبعا انا كنت فاكرة ان المحشي هو وضع قليل من الحشو داخل الورقة ومحاولة غلق الورقة بحيث يكون شكلها اسطواني والحشو داخل الورقة و .. طلع الموضوع غير كدة بتاتا
مسكت الورقة و حطيت الحشو ولسة ما لفيتش لقيت ماما بتقول
لا لا غلط انتي ماسكاها بالعكس
بصيت لقيت الناحية الخشنة من الورقة قدامي فلفيت الورقة و خليت الناحية الناعمة قدامي
قالت لي لا انتي قلبتيها
رجعتها زي ما كانت و لفيتها وبدأت الجشي
المهم ان ماما كانت مش مبسوطة من وضع الورقة في ايدي و انا بابص على المحشي اللي باعمله و اقارن الاقي الموضوع شبه بعضه خالص
ماما مصرة اني امسك الورقة صح و احشي بالاتجاه الصح
لقيت الساعة عمالة تمر و خطيبي في السكة وانا محتاسة في الحشو
قلت لها مش مهم دلوقتي ، انا اصلي نازلة لما ارجع
لا و الف لا ، هو دخول المحشي زي خروجه
ماما حلفت مش حانزل الا لما اعرف احشي
Panic attack
ده معناها نفسك بيروح و قلبك بيدق و ركبك بتسيب
وماما قالت لي ، يعني عايزة تتجوزي وانتي مش عارفة تحشي ورق عنب
يا ماما يرضيكي الراجل حييجي وانا ايديا متوسخة
المهم عملت الاتجاه الصحيح و كمية الحشو المناسبة و اللفة المظبوطة و جريت غسلت ايدي وغيرت هدومي ، مش علشان المحشي نزل علي ، لا علشان عرقت من كتر الضغط النفسي و الخضة
وبعد كده يوم المحشي لو نازلة ، تلاقوني واقفة في شباك الصالون ومش باين مني غير مناخيري ، قصدي عيني ولما ييجي خطيبي اجري
مش عايزة اقولكم ان محشي ورق العنب رفضت احشيه لغاية لما جاء يوم و كنا عند حماتي و خالات جوزي الاتنين قرروا يحشوا ورق عنب و بما اني خبيرة في الاتجاهات و الكميات قعدت جنبهم و قلت اساعدكوا
قالولي تعالي
فضلت احشي بتاع عشر دقائق و بعدين لقيتعن بيقولولي ، مفاية كدة لحسن بتعطلينا
ليه باعطلكم
طلع ان انا باحشي ورق العنب و احطة في الحلة تقوم خالته تشيلها و تفكها و تديها لخالته التانية تحشيها من جديد
احمدوا ربنا ان الجيل الجديد مش بيقيس المحشي بالمسطرة و القلم زي امهاتنا
واحنا كمان امهات مفوتة مش بندق على كمية الحشو و لا اتجاهات الورقة احنا لما اولادنا بيجبولنا كباية مية بنزغرد