مين عايز شكولاته الا كوكا

انا طول عمري باحب اخواتي زي عيوني
اختي الكبيرة مثل اعلى احب ابقى زيه بنت ناس بصحيح
اخويا الكبير ده لوحدة حتة من الجنة سعادتي كلها وانا معاه
اخويا الصغير حنية الدنيا فيه كله عاطفة وباشعر معاه بالامان
ولكن اخويا الصغير كان دايما بيزعل مني
زي ما ناس كتير ممكن تزعل مني من غير قصد
وانا لما كنت ازعل منه ساعات افتكر وساعات لما انام تاني يوم انسى
كان لما يزعلني بعد الظهر وانا اتنطط من الزعل واقوله مخاصماااااك عمرك ما تكلمني تاني ابدا
ويعدي بعد الظهر وانا مكشرة وانام
بعد النوم الجميل والساعات المريحة
اصحى تاني يوم واقوله صباح الخير
ما يردش
صبااااااح الخير يا جميل
ما يردش
فيه ايه
يبص لي ويقول لي
مش انتي مخصماني
احاول افتكر هو كان عمل ايه مزعلني
ويدخل يغسل وشه وانا سرحانه في السقف
هو كان زعق والا اخد مني حاجة ما رجعهاش والا يمكن كسر لي لعبة
المهم بعد المدة الطويلة والسرحانة الاقي نفسي مش فاكرة
اقول له خلاص انا مش مخصماك
صباح الخير
ما يردش
اقول له فيه ايه
يقول لي انتي صالحتيني لكن انا مش مصالحك
ليه يا عم
فيه ايه
اهو كدة انا مش مصالحك
الله اذا كان انا اللي زعلانة
اهو كدة مفيش كلام بينا ولا لعب ولا اي حاجة
وينزل يشتري اجدع شكولاته في البلد ويدخل الاوضة واحنا قاعدين نتفرج على واحدة من التمثيليات اياها بتاعة حسين رياض وعبدالله غيث وهو عامل عبيط
وانا ابص له لاننا بقينا بعد الظهر يعني المفروض ان مفيش حظر خلاص
يدخل ويعزم على اللي قاعدين كلهم ويقول بعلو صوته
مين عايز شكولاته الا كوكا
وفي العادي كوكا هي بتاعة الشكولاتة
يخلص اليوم وهو منشف ريقي
تاني يوم يعمل في مصيبة
ابص له واقول له
انا حاخصمك لكن لما اصالحك تتصالح
لكن على مين
في الاخر
مين عايز بسبوسة الا كوكا
مين عايز كنافة الا كوكا
في الاخر كوكا ما بقيتش تزعل منه ابدا
قال على راي المثل
الباب اللي يجيلك منه الريح
اتغطى وانت تستريح