احب مين والا مين انا عايزة اتجوز مصر
ذكريات 95
مصرية حتى النخاع
مصرية حتى النخاع
احب بلدي اكثر كل يوم
احب ترابها اللي بيسيبه الزبال ويكنس الورق ويلمه على جنب والهواء يرجعه تاني يملا الشارع
احب هواها اللي مليان دخان وبيملا رئتي سواد من الاتوبيس اللي سواقه حاطط فوطة صفراء بيمسح بيها وشه
احب عربياتها اللي كلها متخربشة بايدين ولد نفسه يقول كلمة من غير ما يتسك على دماغه فياخد المسمار ويعلم على عربيات الشارع كلها
احب المدرس اللي بيدرس لغة مش عارف ينطقها ويقولك بي تقيلة وبي خفيفة
احب الكتب اللي نصها مش لازق في الكتاب والكاتب طالع عينه علشان تقرا منها الصفحة اللي وقعت
احب الجرائد اللي نصها رياضة والشباب كلهم عندهم انيميا
احب الفلسفة بتاعة السواق وهو بيقول لي ان ايات القرآن كلها رمضانية وما نزلش الوحي في اي شهر تاني
احب بتاع الامن اللي بيخاف من خياله بس لابس بدلة زرقاء برتب ومش عارف السكان من الضيوف
احب الام اللي بتحل الواجب لاولادها علشان ياخدوا نمر وتفرح بنمرهم
احب الفلاح اللي ممكن علشان يساعدك تطلع العربية من الحفرة يكسرلك فيها فانوسين ومراية
احب العامل اللي بيربط البلف علشان بينفس والبلف اساسا متصمم انه ينفس
احب الراجل اللي ماشي بيفكر في بكرة ويديني كتف قانوني ولو ابتسمت يضحك ولو كشرت يشتمني بالاب والام
احب الست الطخينة اللي نازلة طحن طول النهار ولما تشوفك تتمسكن وتقولك ما دقتش الزاد من امبارح علشان تاخدلها قرشين
احب السفرجي اللي بيتلائم علشان البقشيش
احب المنادي اللي مش جنبك ولما العربية تطلع يجري وراها ويقول من هنا يا بيه
احب الشمعدان اللي كل سنة يصغر لما حيدوهولنا حبوب
احب الطوبة الكبيرة اللي في الشارع علشان ما تقفش قدام المحل ولما واحد ولما صاحب المحل يروح البيت يشتم اللي حاطط سيخ حديد علشان يحجز مكان ركنته
احب عسكري المرور اللي بيزعقلي علشان واقفة تحت ممنوع استعمال آله التنبيه وهو فاكرها ممنوع الوقوف
احب العسكري اللي بيكتب مخالفة وهو مش بيعرف يقرا
احب ظابط البوليس المنفوخ اللي فاكر نفسه ياما هنا ياما هناك وبيتنطط علينا ولما تعدي عربية شرطة يقفز ويضرب تعظيم سلام للباشا
احب البنت الصغيرة اللي رايحة المدرسة ومعاها اخوها ماسكاه من ايده وهي اساسا مش عارفة تعدي الشارع
احب الام اللي بتروح الشغل علشان تساعد جوزها وهو بيروح شغلانتين ونفسهم يجيبوا كمبيوتر للولد علشان يعرف يذاكر
احبك يا مصر
احب محل العصير اللي ريحته زي الخمرة من كتر ما عصير القصب اللي واقع على الارض اتخمر
احب عيادة الدكتور اللي بويتها واقعة علشان يخزي العين
احب البواب اللي يجري ورايا علشان يعرف انا رايحة فين
احب ابن البواب اللي جنينته هي داخلة العمارة
احب اصحابي اللي ممكن يحبوني زي اختهم بصحيح
احب مديري اللي بيشتكي من مديره اللي بيشتكي من المدير الكبير
احب زميلي اللي حاطط عينه على الترقية بتاعتي وبيتخابث ومفقوش
احب عامل الكافيتيريا اللي بيجيب لي شاي من غير ما اطلب وعلى حسابه علشان شافني مكشرة
احب العامل اللي حبني وعطاني عينيه علشان بابتسم في وشه
احب الطفل المشرد اللي ممكن اديله موزة يجري جري يقسمها مع الواد صاحبه
احب الكمساري وهو حاطط الفلوس في صوابعه
احب سواق التاكسي اللي حاطط القرآن ومعاه صدى ما يخليكش فاهم ولا كلمة
احب اللي يقولك ربنا بيقول القرش الابيض ينفع في اليوم الاسود
احب البنات اللي عايشة على الريجيم
احب الام اللي فاكرة عيالها ما بياكلوش وهم عجول
احب الام اللي فاكرة السفر للقاهرة او لاسكندرية ده سفر يتفطر فيه
احبك يا مصر يا حبيبتي
احب اللي سايق العربية على الشمال وعايز يحود يمين
ردحذفاحب اللي بيخش شارع غلط ويضحك لما تقوله انت غلط
احب اللي يقولك غلط كدة ويحود في اول شارع غلط
احب بياع البطاطا الملزقة السخنة
احب بياع اللب اللي بيتف في الكيس علشان يفتحهولك
احب بياع الترمس اللي بينسى يديك الباقي
احب بياع التين الشوكي اللي ماشي في الشوك كل يوم علشان كام جنيه
احب عربية الخضار اللي جاررها حمار
احب الحنطور اللي موسخلنا شوارعنا
بجد....مش لاقية كلام اقوله بجد
ردحذفبس الاكيد انك انتى احلى عشان عرفتى تقولى الكلام ده
وانا أحب كل هؤلاء معك
ردحذفوأحب أيضا عمال التراحيل اللى بيحسبوا الترحيلة هتجيب ليهم كام جنيه وهم ممكن يموتوا من تعب شغلها
وأحب ميدان المطرية والعمال ملمومين على عربية اخر موديل علشان يقبضوا اجر اليوم بدل مايروح عليهم
واحب الحلاق اللى عدته مقص وموس وفوطه وفارش فى الشارع
واحب عربية الفول اللى واقف عليا ييجى عشرين موظف وعامل فى الفجرية يفطروا فول وماية سلطة ويبئى الحظ ابتسم لو لقوا بصلة ولا ربع لمونة معصورة قبل كدة مرتين
واحب الفلاح النونو وهو ماشى بين بقرة وجاموسة لاهو سايق اللى امامه ولا قائد للى وراه والكل ماشى فى الطريق المحفوظ
وأحب مصر اللى فيها الغريب آمن وحقه مايضيع ولا ينضام
أحب مصر المطر يرخ يرخ والاطفال فى الشوارع تلعب وتتزحلق على الطينة والام تزعق وترجع تغسل وتغسل وتغسل
بنحاول نقلدك يا اختنا كوهينور لكن بجد كل ماقلتيه اروع من الروعة وهى دى مصر التى أعشقها ويحبها كل المصريين ولن نرتضى عنها بديلا ولن يملا قلوبنا غيرها
اقبلى تحياتى وتقديرى
آه...كنتى بتقولى كل واحد يزود حتة ..و لو انى باردو مش حعرف اقولها زى اللى كتبتبهم..
ردحذفاكتر حاجة بحبها فى المصرى انه بياخد حقه بالادب: فى الكورة ياخد حقه باللعب النظيف جوه الملعب مش بره الاستاد و لا فى المدرجات..
فاكرة الست أمينة فى بين القصرين ما قالت لكمال إبنها على الانجليز:"عايز تمشى الانجليز ليه يابنى دول معانا طول عمرهم على الحلوة و المرة!؟؟ "المصرى لا يقتل عدو على ارضه بل انه فى غاية الكرم معه و يفضله على نفسه و اهله كأنه ضيف و ليس عدو لكنه فى اليوم اللى يقرر فيه أنه يحاربه ففى ميدان المعركة يقاتل بشجاعة و لو كان بدون سلاح و عدوه يفوقه بمراحل فى السلاح و العتاد .يقاتل برووووووحه
(ده الادب لكن بصراحة لما الادب يزيد عن حده ينقلب لضده)
و بحب المصرى اوى اوى لمايستغل خفة دمه مش فى الهروب و امتصاص المشاكل..لا فى القضاء على عدوه..لما يعمل عبيييييييييط علشان فيه واحد أعبط منه حب يستعبطه فيفضل يهزر و ينكت و يعمل غلبان شوية وخايف شوية و مش عارف حاجة شوية ويسيب التانى يسوق فيها و ياخد راحته على الاااخر.. بعدين مرة واحدة بدون انذار يقوم عليه يضربه القاضية و يربيه و بعدين يرجع تانى ينكت عاااااااااادى جدا و لا كأنه حصل حاجة..
وبحب المدرس اللي يقول لتلامذتة متجوش المدرسة وذكروا في البيت انتو كده كده بتخدوا دروس....بحب الأم اللي بتنصح بنتها ان متخرجش اسرار بيتها بره حتي ولو لأمها....بحب الجار اللي يعمل حساب جاره ..وبحب اللي بينادى علي صاحبه بكلاكس العربيه ساعة إتنين بالليل
ردحذفبحب المواطن اللي يبصق ويتنخم في الشارع وينظر لك بإبتسامة صفراء بحب ربة المنزل اللي تعمل مجلس نميمه وتسيب الأكل يتحرق علي النار بحب الواحد اللي مش فاهم ويعمل ةابو العريف ويتكلم في اللخبطان بس بقي انا تعبت
بحب الاب اللي راجع ببطيخة وعرقان وكل اللي عايزة اولاده يلفوا حواليه
ردحذفبحب الام اللي مش طايقة نفسها ومش عايزة حد يكلمها وبتزعق في العيال وهي اساسا بتعمل لهم كام كيلو كحك علشان تبسطهم
احب الزوجة اللي بتحب جوزها و من خوفها عليه تقول له طلقني
احب الشغالة اللي بتجيب لك البلوزة وعينها عليها
احب زمليك اللي بيداري عليك لما تتاخر في الشغل
احب زمليتك اللي عينها مينك وتقولك احنا اخوات
احب الشاب اللي مش لاقي يتجوز ومستعد يشيل دين صاحبه علشان بيتجوز
احب ام كلثوم لما تبقى في الخلفية ولا انت سامع كلامها ولا مركز مع المزيكا بس مبسوط
احب اغنية اهلا رمضان بتاعة كل سنة
احب ياليلة العيد اللي بنعرف منها الرؤية
احب ليلة رمضان لما مش عارفين حنصلي التراويح والا حنام من غير عشاء
احب لما الواد الصغير في الفلاحين تلاقيه راكب على الحمار والحمار بينططه وهو عامل فيها راجل
احب الجزار لما يضحك عليكي ويحطلك لحمة سمينة علشان يا عيني بيخسر
احب المدرس لما يذنب الولد علشان يرضة ياخد عنده دروس خصوصية
احب التلميذ اللي نفسه يجيب وردة لمدرسته في عيد الام علشان تعامله حلو
احب الصبح لما افتح الشباك واشم الهوا قبل العربيات ما تلوثه
احب قعدة المغربية في الزراعية والشاي على الراكية
احب الدوار اللي ما بقاش بتاع الزوجة التانية ولكن بقى دار مناسبات
احب التراب اللي بيطلع من العربية وهي ماشية بسرعة في القرية المصرية
احب ريحة الزريبة لما يطلعلك منها عجل صغير بيبص لك بصة ما تفهمش منها حاجة
احب العيد الكبير لما كل شارع تلاقيه فيه مية حمراء
احب الستات اللي بتروح تلم اللحمة في العيد من كل ناحية وعاملة غلبانة وهي مش عارفة تمشي من طبقات الدهون اللي على جسمها
احب البياع لما يتنفخ من الستات اللي بتسأل كتير
احب كرامة المصري لما تستريح بابتسامة مؤدبة واخرها اعتذار
احب كرامة المصري لما تثور ومحدش يعرف يطفيها
باحبك يا مصر
احب المثقف اللي مخة يوزن ميت راجل وعايش في بلده شحات
ردحذفاحب الدماغ الذكية اللي حتى لو اتربت في الشارع بتعرف تتصرف
احب الولد اللي اهله راميينه ولما تطبطبي عليه يعتبر ان طاقة القدر اتفتحتله
احب الحجاب المصري اللي اتفننت فيه كل البنات حتى الفنانات
احب الناظرة اللي عامله شديدة ولما تجيلها صاحبتها زيارة تحوش الضحكة علشان ما ياخدوش عليها
احب الجدة اللي بتربي على الادب والام اللي بتربي على الدلع والاب اللي بيربي على الشدة والصاحب اللي بيشيل كل التربية دي ويربيه على طريقة جيله
Kohinour Ahmed Osman
ردحذفباحب اعلاناتها اللي تخليك تفتكر المنتج غصب عن اللي جابوك
وباحب عيالها اللي بيعيطوا مع امهاتهم في كل المواقف والست ترزعه قلم على قرصة وهي بتبصلنا وناقص تحلف انه مؤدب
وبحب الستات اللي عندها اصرار في تسمية البنات اسماء من 3 حروف
وبحب الاولاد في المدارس اللي فاكرين انهم عسل علشان بيرخموا على المدرس ويقلوا ادبهم عليه
وبحب البنوك اللي تكتب اسلامية ولما تسأل الراجل على الشباك هي اسلامية في ايه يقولك وبمنتهي الصراحة ، كله زي بعضه ده بس علشان يقللوا الفائدة
وبحب القاعدات اللي الناس كلها بتتكلم في نفس واحد وكل واحد مروح يقول لمراته بس اسكتي انا كتمتهم كلهم
وبحب الست اللي يتقطع نفسها طول اليوم علشان جوزها يقول لها تسلم ايدك وهو كل اللي بيفكر فيه البطيخة ساقعة والا سخنة
وبموت في الراجل اللي مراته راحت قصت شعرها ودفعت نص مرتبها عشان يقولها يا قمر يقوم يقولها كان لازم الغرامة دي مش كنا اتعشينا بيهم بط