هو ايه الفرق بين العيب و الحرام
زمان مامتي كانت بتقول لي
عيب تتكلمي بصوت عالي
عيب تاكلي و انتي ماشية
عيب تديني حاجة و انت مش باصَّالي
عيب تتكلمي مع ولد غريب
عيب تروحي لناس من غير ما تستأذني
عيب تفتحي الباب و انتي مش لابسة كويس
عيب ان الضيف ييجي من غير ما تديله احسن ما عندك
حرام تاكلي قدام واحد غلبان
حرام تزعقي للشغالة
حرام تكذبي
حرام تظلمي
لكن ما كانتش تقول لي حرام تلبسي مايوه
ولا حرام ما تصليش
المهم القائمة طوييييلة جدا و أنا كنت لما أقعد لوحدي أقول
هو العيب حرام و الا لأ
هو ايه الفرق بين العيب و الحرام
هو أنا حاتعاقب من ربنا لو عليت صوتي
هو الأكل و أنا ماشية إيه مشكلته
المهم مع أولادي بقيت بس أقول حرام و مفيش عيب
و النتيجة ان أنا وغيري حطينا قائمة الحرام علشان ربنا و ما بقيناش نحط قائمة العيب
فبنتي اتحجبت ، لكن ممكن تمشي تتكلم في الشارع و تأكل
و لقيت ان في قائمة العيب تعتبر قائمة المكروه في الإسلام ، يعني الأكل له احترام و مش من الصحيح إني آكل و أنا ماشية
ان غض الصوت من وصايا لقمان
و غيرها و غيرها و طلع كل العيب سلوك اسلامي و لكن
احنا جيل طلعنا أولادنا محجبات و بيصلوا و لكن الآداب المختلفة إللي كنا بنعتبرها قيود ، بوظت العلاقات العامة بين الناس و خلت كل واحد بيقول نفسي نفسي
و أتاري القيود مهمة مهمة مهمة
أنت من اهل البلاليج ؟ نحن قوم دعينا لهذا العالم ولم نكف عنه ونعتبره افضل من الفيس بووك لأنه لاتختفى فيه المقالات ولا التعليقات وهو مجال خصب للتعبير والتفاعل مع الزملاء ..كانت قيود الأمس تربية ودور للمنزل يقوم به الأهل لتقويم السلوك لدى النشء فلما انشغل الأهل بلقمة العيش والمدرسة بالمال والدروس الخصوصية فقدنا هذا الدور المشترك
ردحذف