اول محاضرة في هندسة

-



ذكرياتي 78
انا واحدة جاية من الدار للنار فاكرة ان كلية الهندسة لعب و كل صلتي بالكلية افلام الستينات والناجح يرفع ايده وحسن يوسف بقى زميلي و ادور على حد شبه اي حد من الممثلين مفيش خالص
سكشن 29 فيه 4 بنات و الباقي دخلنا في محمد بقى واديله محمد حوالي 6 والا 10 سكشن كاملين
وكلهم من المحافظات و الأقاليم وانا في وسطهم واحدة لابسة ميني جيب او بنطلون وكان البنطلون على ايامنا (في الريف) يعتبر استرجال يعني عاملة نفسها راجل وانا الصراحة مكنتش معتبرة ان الموضوع ده شتيمة
خلصت السكشن الاولاني و انا حاسة اني تحت ميكروسكوب وجريت على المحاضرة الاولى في حياتي وكانت محاضرة فيزياء ودخلت المدرج الكبير بتاع اعدادي كلية وفيه م يقلش عن 600 نفر وكلهم بيدخلوا و يطلعوا و انا واقفة مستنية الدنيا تفضى علسان ادخل لكن ميييين المهم ان انا في الآخر لقيت مكان بين اتنين بنات ورحت قاعدة في وسطيهم وكانوا اسمهم ماري و لوسي وهم زي القمر من اصل يوناني بس حسيت ان اقدر اتكلم معاهم
دخل الدكتور المدرج وانا قاعدة في الآخر و مش شايفة الا راجل من بعييييد عامل زي الجندي بتاع الشطرنج
يا دوبك باين والسبورة من وراه قد الكف و ماسك في ايده جهاز قد علية الكبريت ولقيت واحد من اللي قاعدين و شكلة مخضرم بقاله في الكلية عدة سنوات وقال :
حللو بالكم ده بيشتم
انا عيوني بحلقت و خفت اتهزأ و اتسمرت في الكرسي
المهم ان الدكتور قعد يشرح وانا طبعا متسمرة و الاقيه بيقول
شايفين المؤشر بيتحرك ازاي
المؤشر يا مفتري
انا اساسا شايفاك بالعافية
قلت الكلمة دي بصوت مسموع و لقيت اللي قدامي بيضحكوا
راح الدكتور ساكت تماما وبص ناحيتنا و قال
الحمار اللي جنب الحمار اللي حنب الحمارة اللي قدام الحمار اللي جنب الحمارة
كل دول يطلعوا برة
مش حاقولكم ان صفين قدامي طلعوا كلهم برة و انا قعدت ابص في السقف و اصفر لاني اكيد مش حمارة
ودي كانت اول محاضرة

تعليقات

إرسال تعليق

المشاركات الشائعة من هذه المدونة

مين عايز شكولاته الا كوكا

-
انا طول عمري باحب اخواتي زي عيوني اختي الكبيرة مثل اعلى احب ابقى زيه بنت ناس بصحيح اخويا الكبير ده لوحدة حتة من الجنة سعادتي كلها وانا معاه اخويا الصغير حنية الدنيا فيه كله عاطفة وباشعر معاه بالامان ولكن اخويا الصغير كان دايما بيزعل مني زي ما ناس كتير ممكن تزعل مني من غير قصد وانا لما كنت ازعل منه ساعات افتكر وساعات لما انام تاني يوم انسى كان لما يزعلني بعد الظهر وانا اتنطط من الزعل واقوله مخاصماااااك عمرك ما تكلمني تاني ابدا ويعدي بعد الظهر وانا مكشرة وانام بعد النوم الجميل والساعات المريحة اصحى تاني يوم واقوله صباح الخير ما يردش صبااااااح الخير يا جميل ما يردش فيه ايه يبص لي ويقول لي مش انتي مخصماني احاول افتكر هو كان عمل ايه مزعلني ويدخل يغسل وشه وانا سرحانه في السقف هو كان زعق والا اخد مني حاجة ما رجعهاش والا يمكن كسر لي لعبة المهم بعد المدة الطويلة والسرحانة الاقي نفسي مش فاكرة اقول له خلاص انا مش مخصماك صباح الخير ما يردش اقول له فيه ايه يقول لي انتي صالحتيني لكن انا مش مصالحك ليه يا عم فيه ايه اهو كدة انا مش مصالحك الله اذا كان انا اللي زعلانة اهو ...
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب...
قراءة المزيد

يامرايتي يا مرايتي

-
يامرايتي يا مرايتي مين اجمل واحدة في الدنيا دي اللي قالته الملكة ولما المراية قالتلها سنو وايت و بياض الثلج قررت قتلها فيه ناس مش بتشوف نفسها في المراية لكن بتشوف المراية تقول لها ايه فيه كتير من الناس بتستنى تشوف الناس تقول لها ايه عن نفسها وتعتمد على الكلام ده في انها تشوف نفسها اعرف بنت صغيرة المدرسة كانت بتتكلم عن التميز في الشكل واشارت الى حجم انف الفتاة انها تتميز بانف كبيرة والله اعلم ان انفها جميل ومتناسق مع وجهها وان تلك الفتاة كانت جميلة ولكن هذا الوصف حول في حي اة الطفلة وافقدها الكثير من الثقة في النفس . ياريت نشوف نفسنا في المراية زي ما ربنا خلقنا نشوف انسان جميل سجد له الملائكة وغضب الله على ابليس لانه لم يسجد له نشوف خلق الله الجميل اللي مهما شعرنا ان فيه عيوب لكنها مش عيوب ده تميز نشوف قلبنا قبل وجهنا مفيش داعي تعتمد على رؤية الناس لك علشان تعرف انت مين لازم تعتمد على رؤيتك ولو شفت حاجة مش عاجباك حليها باخلاقك وعطفك وحنيتك صباحكم زي الفل والياسمين
قراءة المزيد