اللي تحبيه اخفيه

ذكرياتي 37

طبعا احنا تلاتة فرسان و اميرة و الأميرة هي اختي الكبيرة و الفرسان التلاتة في اي حاجة لها دعوة بالحلويات و الشكولاتات زي الجراد و لما كان بابا يبعت لنا الشكولاتة الكادبري و الا المستيكة المستوردة في زمن الانغلاق و المستيكة الجبس و الله المستيكة المصري ساعتها كانت تدوب في بقك و تنزل تراب ابيض شبه الجبس
مرة بابا بعت لنا كمية من الحلويات و انا كان نفسي ما يخلصوش على طول و لذلك هداني تفكيري اني اخبي علبة مستيكة كاملة و فيها بتاع خمسين واحدة ، تحطيهم فين ، تخبيهم فين ، لازم مكان ما يعرفوش الجن الازرق و لا الفرسان و بالأخص الفرسان
المهم حطيته في الدولاب مع غياراتي و دفسته و كل ما احب آكل و الا اجيب واحدة مستيكة ، احسبها و الاقى ان السر حينكشف و يبان فاقول بعدين
وفي مرة لقيت فيه نمل كتير كتير في الدولاب و ايه بقى طوابير و لقيت ماما بتشتكي من النمل اللي ظهر كتير و انا بقى و لا على بالي ، خصوصا ان النمل زمان كانوا بيعملوله نملية ، يعني دواليب المطبخ قبل التلاجات كان اسمهم نملية و بالتالي النمل جزء من حياة المرأة المصرية
في يوم جمعة و كانوا اخواتي برة و بيلعبوا في الجنينة و انا لقيت الوقت مناسب اجيب واحدة مستيكة اكلها ، الظاهر كان فات على موعد صلاحيتها (باهزر) المهم اني شلت أكوام الهدوم و الحاجات اللي مخبياها تحتهم و لقيت المفاجأة
لااااااااااااااااااااااااااااااااااااااا
النمل عرف طريق المستيكة و كل نملة ماسكلها واحدة و عمالة تنحت فيها و انا بقى قلبي انفطر و احلام المستيكة اللي مافيهاش جبس راااحت
و طبعا اتفضحت قدام اخواتي و قعدوا ماسكيني مدة على اني خبيت منهم المستيكة و في الآخر ما نابنيش منها حاجة
الآن و بعد هذه الحادثة المريعة اللي راح ضحيتها خمسين علبة مستيكة من أجود الانواع بقيت و اصريت اعزم على كل اللي اعرفهم و ما اعرفهمش بأي حاجة عندي و دايما اقول لنفسي أهم أحسن من النمل