مين فتح الراديو من ورايا

وانا صغيرة و نتيجة اني كنت اروبة وباحب اشغل مخي كتير فكنت دايما عندي ارق ، وكانت ماما حاطاني مع اختي في الأوضة بس في سرير من سراير الأطفال و أنا فاكرة والله مش حتصدقوا على الرغم من اني كنت مش باعرف اتكلم لسة ، يعني فاكرة لما عبد الحليم غنى اغنية قولوله الحقيقة و انا كنت امشي في البيت أقول : لو لو ... لو لو الحقيقة وانا مش عارفة مين لولو دي و كنت باحب اغنية أنا عندي لك مواعين (ما كنتش اعرف انها مواعيد و كنت فاكرة مامته عايزاه يساعدها في المطبخ)
المهم من كتر التفكير كنت مش باعرف انام فماما قررت تعمل حاجة في منتهى الجمال ، قررت تسجل الحكايات على التسجيل (اللي بشرايط زي شرايط السينما القديمة ، يعني جهاز في حجم الميكروويف تقريبا) و تحط التسجيل جنبي و تشغله لغاية لما أنام ، لكن على مين يا ماما ، ده أنا مصفحة ، تروح ماما و ترجع تلاقيني صاحية و الشريط خلص فترجعه بزرار rewind و ترجع تعمل له play و اختكم عرفت اللعبة وفهمت المستخبي و لماما مامتي رجعت تشقر علي لقيتني بأرجعه من الأول علشان اسمع الحكاية تاني و تاني و تاني و تاني ....
الموضوع بتاع الريكوردر ده برمج لي دماغي غلط ، و افتكرت ان كل حاجة بتتكلم و تغني ينفع نعملها rewind و stop و play ، علشان كدة مرة كنت باسمع اغنية لولو و كنت عايزة ادخل الحمام فرحت دورت على زرار stop ما لقيتوش ففكرت اقفله على الأغنية لغاية لما أطلع من الحمام أكملها و شوية ومامتي لقيتني قاعدة باعيط جامد جدا و سألتني مالك ، قلتلها ، فيه حد فتح الراديو من غير ما يقول لي
طبعا ردت بحزم ، وهو كل واحد يفتح الراديو لازم يقولك ، قلتلها ايوه ، لأن أنا كنت قفلته على اغنية لولو و دلوقتي مش لاقياها
قالت لي و قفلتي عليها ليه، قلت لها علشان كنت عايزة اسمعها دلوقتي
قالت لي وهي حتستناكي
قلت لها طبعا
أنا عملت
stop
و كنت ناوية اعمل
play
لان الراديو مفيهوش
rewind