العقدة النفسية الامهاتية
ذكرياتي 19
انا اللي في الوسط عارفين يعني ايه ، يعني اعراض الطفل الشاعر بالظلم و المهضوم حقه ، دي الاعراض العالمية المعروف عنها في علم النفسMiddle child syndrome
و للاسف الشديد اتفرجت على فيلم كان البطل لقيط لقوه على باب الجامع و مش حاقولكم يومها كان ايه شعوري ، نمت وحلمت ان انا مش بنتهم و ان بابا لقاني على باب الجامع و صحيت الصبح و رحت لاخواتي و فضلت ابص في وشهم ، يا ترى هم اخواتي و اللا لأ ، و لقيت ان اخويا الصغير شبهي و افتكرت ان كل قرايبي كانوا يصروا على ان انا شبه بابا
قعدت مع نفسي افكر ، يبقى بابا هو بابا بس ماما مش ماما و بابا و ماما هم ماما و بابا بتوع اخويا الصغير ، لكن ممكن ما يكونش ماما هي ماما لي و له ،
نهايته مع التفكير الشديد لقيت قصة ممكن اصدقها
بابا اتجوز ماما
جابوا اختي الكبيرة
جابوا اخويا الكبير
بابا اتجوز واحدة تانية و جابوني
الست التانية ماتت لما خلفتني (علشان انا نحس)
بابا جابني لماما و قال لها انه لقاني على باب الجامع
بابا رجع لماما و جابوا اخويا الصغير
طبعا كان هو ده الحل الوحيد لوجودي بين ثلاثة تانيين و اكون شبه بابا و مش شبه ماما و عشت ايام من الافلام العربي و قررت اني اهرب و اتجوز بياع الجرايد و اعيش ابيع يناصيب
وفي مرة اخذت فلوس علشان اشتري لماما شوية حاجات ، فكرت في السيناريو بتاعي بس لقيت الدنيا برد و بياع الجرايد مش غاسل وشه و اسنانه صفراء و فيه ناس شكلها غريب في الشارع قمت رجعت البيت بسرعة و سألت أخويا الكبير
هو انا شبه ماما و إلا لأ
قال لي الخالق الناطق
ساعتها اخذت نفس كبير ، طبعا الجملة دي مشيت معايا كويس
وغيرت السيناريو
بابا اتجوز ماما
خلف اختي ثم اخويا ثم انا ثم اخويا
و انا فضلت و اتجوزت واحد محترم و ما بعتش جرايد في الشارع
تعليقات
إرسال تعليق