الرأسمالية و الاشتراكية في العائلة المصرية

ذكرياتي 21

الرأسمالية و الاشتراكية في العائلة المصرية

-->أخويا الجميل و الكبير سمع عن الرأسمالية و الاشتراكية وهو في ابتدائي وقرأ عن الاشتراكية اللي كانوا بيشربوهالنا فقرر انه لازم يطبق الموضوع بالطريقة الصحيحة وده علشان هو شعر ان بابايا و مامتي بيستغلونا زاحنا لازم نعمل تصرف مناسب اولا: عمل معانا ورشة عمل يفهمنا فيها الموضوع و انا فاكرة وهو بيقول ان طول ما الفلوس معاهم يبقى احنا مالناش رأي و ان بابايا و مامتي بيستغلونا و بيفرضوا رايهم علينا طول ما احنا معتمدين عليهم و لهذا السبب لازم نحوش و يبقى معانا فلوس بحيث تكون لنا قوة و استقلال ورأي ، انا و اخويا الصغير كنا طبعا موافقين على الموضوع ده، خصوصا ان انا كان نفسي اشتري لعبة بتاعة مواد كيميائية و مامتي مش موافقة علشان خايفة علي لتفرقع في وشي و الا اسيح اخواتي بحامض كبريتيك انتهت المناقشة بالبدء في عمل مشروع الغرض منه اننا نجيب فلوس تخلينا مش مستعبدين والمشروع هو عمل جهاز يستعمله الناس علشان يشوفوا اللي ماشي وراهم أو لو كانوا متراقبين طبعا الجهاز ده حنبيعه !!!!!! و يبقى معانا فلوس كتير !!!!! نجيب بيها كل اللي نفسنا فيه !!!!!!!!! أول خطوة ان احنا اعطيناه كل مصروفنا له علشان لازم نبقى جبهة واحدة بعد كدة طلب من ماما تعلمنا الاركيت و طبعا ماما جابت ابلكاش و منشار و بعدين علمتنا نقص ازاي واخدين بالكم من الندالة ، بتعلمنا علشان نستقل عنها المهم ان احنا عملنا المشروع الجميل بتاع العملاء السريين و الجواسيس الي ممكن يخليك تشوف اللي وراك و هو عبارة عن صندوق على شكل اس يوضع على الكتف و ناحية من الحرف فيها مرايا تشوف فيها و الناحية التانية تنعكس فيها مراية تشوف اللي وراك طبعا مشروع فاااكيس جدا يعني حتبقى ماشي و على كتفك صندوق زي بتاع الجزمجي على كتفك علشان تشوف اللي ورا اكيد اللي ورا حيخبط على كتفك و يقول لك ممكن تلمعلي الجزمة و في الآخر تتخانق علشان كرامتك وجعتك انا دلوقتي مش باتكلم على المشروع لازم افوكس focus المهم ان اخويا الكبير ضرب على المصروف بتاعي انا و اخويا الصغير و كان بياكل شكولاتة كل يوم و المصروف بتاعنا في علبة مقفول عليها بالأرقام وحاولنا المستحيل ان احنا نرجع المصروف