بابا جاب اتنين بعجل

ذكرياتي 27
الباتيناج في الستينات كان مشهور جدا ، حتى كان فيه جنب مسرح كوتة ساحة للباتيناج و بالتالي بابا ما حرمناش من المتعة و جاب لنا باتيناج (طبعا الأخوة الفرسان بس لأن اختي ما كانتش تحب الحركات دي) المهم أن بابا جاب اتنين بعجل من غير كاوتش و واحد بعجل بكاوتش
طبعا انتم مش عارفين ايه الفرق
الفرق ان أنا و اخويا الصعير الباتيناج بتاعنا من غير كاوتش فالاتزان عليه أسهل و عامل زي عربيات الشوبينج بتاعة فتح الله اللي بتزقيها بالعافية ، لكن باتيناج اخويا الكبير عامل زي عربيات الفا و إلا مترو ، لما تزقيها تجري
انا طبعا فرحت ببتاعي و كنت غيرانه من بتاع أخويا الكبير ، لكن الرتب عندنا في البيت كانت مهمة و لا تتعدى رتبة على رتبة و بالتالي لم يكن لي الحق في استعمال الباتيناج أبو كاوتش
كنت الصراحة بامشي بالباتيناج بتاعي بس ، ماكنتش باجري بيه ، لأنه لازم تكون الأؤض مستقيمة و ناعمة و متبرشة ومدهونة و متلمعة علشان يجري
في يوم و في لحظة روقان ، كان أخويا الكبير راضي عني و لذلك قرر انه يسمح لي بلبس الباتيناج بتاعه
كنا قاعدين في اوضة القعاد (living room) وهي طويييلة حبتين و وقفني اخويا في أول الأوضة و لبست الباتيناج و بعدين راح وقني من ورا
آآآآآآآآآآآآآآآآآه ه ه ه ه ه
ده صوتي و أنا ماشية في الأوضة و شعري واقف من الخوف
بوووووووم
ده صوتي لما خبطت في الكنبة إللي في الوش
آآآآيي ي ي ي ي ي\
ده صوتي و أنا بانزل تحت الكنبة و قصبة رجلي محشورة تحتيها
ووووف
ده صوت اخواتي الاتنين وهم بيجروا برة الأوضة علشان لما ماما تيجي تلاقيني لوحدي و يبقوا هم برة اللعبة
و أكيد دي كانت آخر مرة ألعب فيها باتيناج