برج السرطان

ذكرياتي 6
أنا من برج السرطان يعني من النوع اللي يحب يحوش و بييجي على نفسه و على أيامنا كان المصروف اليومي للفرد العادي نص فرنك أي قرشين ، عارفين المليم !! ، طبعا مش عارفينه و لا النص فرنك طبعا ، المهم كانت الفلوس بتاعتنا هي التعريفة و هي نصف القرش و القرش و القرش كان عشرة مليم ، و كان لما بابا يبعزق يدينا شلن وهو خمس قروش و البريزة دي كانت في الأعياد
يا نهاري ده أنا عجوزة قوي ، أنا مش حاكمل الذكريات دي دلوقتي ، لازم أروح ألعب رياضة واتكلم حبة مع أصحابي !!
نهايته !!
انا حوشت من مصروفي خمسة جنيه !!!
فاهمين يعني ايه خمسة جنيه ??!!
يعني مفيش شيكولاته من ام 3 صاغ )نسيت أقول الصاغ هو القرش( ولا فيش سينالكو من اللي بقرش و نصف يعني كله نعناع من اللي بثلاثة مليم أو كرملة بالمستكة من ام نصف قرش و عايشة زي المحرومة ، باتفرج على اخواتي وهم بياكلوا الشكولاتة و كل ده علشان عايزة أحوش خمسة جنيه
خخخااااااااااااممممممممممسسسسسسسة جنييييييييييييييييييييييييييه
و رحت اعطيتهم لمامتي و قلتلها أنا عايزة طقم صيني
والله الطلب ما كانش كتير يعني ممكن يكون الطقم الصيني التعبان بكدة ، وده باعتبره تعويض عن اللعب الصبياني اللي بالعبه مع اخواتي الصبيان كل يوم
كنت نفسي احس اني ست و اعزم العرايس بتوعي على الغدا و الا العشاء
المهم مامتي اخذتني المنشية ، بالحنطور(ايوة محدش يضحك لان ده حقيقي) ، كنا ساكنين في شارع السلطان حسين و كان فيه حناطير كتير قدام كلية الطب و بيقفوا طوابير زي التاكسيات و بالطبع قضينا النهار مع بعض و أنا فرحانة ان مامتي نازلة مخصوص معايا علشان اجيب الطقم اللي بقالي مدة مش بسيطة باحوش له (حارمة نفسي زي ما قلتلكم)
مامتي من وجة نظرها رايحة تجيب لي لعبة (لعبة) يعني لعبة (لعبة) فبالتالي راحت محلات اللعب تسأل على طقم شاي أو طقم صيني علشان العب بيه ، لكن أنا أساسا كنت عايزة طقم بحقيقي زي اللي حاتجوز بيه و لذلك مالاقتش مامتي اللي انا عايزاه ، مفيش إلا أطقم من الصاج التعبان ولذلك قررت (طبعا انا ما كانش لي حق الفيتو زي أولاد الأيام دي) قررت انها تشتري لي جزمة و كانت الجزمة يومها بثلاثة جنيه وإلا حاجة ، المهم أنا شفتها بتطلع الخمسة جنيه بتاعتي و بتدفعهم للراجل و كان ناقص اعيط و أجري لغاية عندها و أنا بأقول لأأأأأأأأأأأأأأأأأأأأأأأأأأأأأأأأأ
بس احترمت نفسي وقلت الكلام ده بيننا وبين بعض في البيت مفيش داعي نتبادل الاتهامات مع بعض قدام الغرب الاحسن استنى لما نرجع البيت و اطلب آخذ انا الخمسة جنيه و اشتري شيكولاتات و بسكوتات و اشرب في اليوم الواحد عشرة سيدر اللي بخمسة صاغ الواحد ، المهم أنا كان عندي شك جامد جدا ان مامتي حتضرب على الفلوس ولو ان فيه نسبة لم استطع اغفالها انها ممكن تطمع فيهم ، لكن سيبت الموضوع لما نرجع البيت و مش حاقولكم كنت عاملة إزاي في الحنطور وأنا راجعة ، عيني على شنطة مامتي ونفسي ابص جوة علشان اعرف ان كان فيه خمسة جنيه تانية غير بتاعتي و يطمئن قلبي ان فلوس الجزمة مالهاش دعوة بفلوسي
وصلنا البيت في نصف ساعة أطول من الدهر و أول ما دخلت قلت لماما ، اديني بقى الفلوس وأنا حاتصرف
قالتلي ما أنا جبتلك بيهم جزمة
لأأأأأأأأأأأأأأأأأأأأأأأأأأأأأأأأ
ودي كانت آخر مرة أحوش فيها و ما زال زوجي يعاني من اسرافي إلى يومنا هذا