تلميذ جيمس بوند الخايب

-
ذكرياتي 13
كنا ثلاثة صغيرين وواحدة أكبر و الأخت الأكبر دايما مع مامتي كل يوم و كل ساعة ، ناخذ اذنها لما نحب نخرج و لما نلعب و نتشاقى هي اللي تسكتنا و بعد الظهر لهم أوضة في البيت بتاعة الكبار واحنا ما نقعدش فيها و الاتنين يقعدوا دودودودودودو لغاية بالليل و لذلك و نتيجة وجود أفلام جيمس بوند و مسلسلات السينت (the saint) قررنا نعرف هم بيتكلموا على ايه و لذلك علينا الذهاب لغاية الاوضة اللي قاعدين فيها الاتنين و كل ده في صمت و خباثة و ده لازم يتم عن طريق واحد
كل واحد في دوره يزحف على بطنه مسافة ما تقلش عن 7 متر ، ثم اللف حوالين الترابيزة زحفا و التوقف امام الباب وانت على الأرض برضة ، الله ، مش انت "جيمس بوند" و بعدين نتصنت على الكلام و ترجع تقول للباقي سمعت ايه
طبعا اللعبة كلها تاخذ الليلة و احنا عمالين نزحف رايح و نزحف جاي و كل واحد أول ما يوصل هناك عشان خاطر الساسبنس يرجع بسرعة لأن مامتي اتحركت و الا اختي كحت ، المهم ان الرجوع دايما بيبقى بسرعة لأننا خايفين لنتقفش
تاني يوم الصبح نقلع البيجامات (طبعا لا يمكن البس قميص نوم هو انا بنت والا ايه) و نروح المدرسة و في الآخر نرجع نلاقي ماما ماسكة البيجامات و لونها اسود و الزراير مقطعة و عينيها كلها تساؤلات و تبدأ الاستجوابات
س : انتم بتعملوا ايه في البيجامات
ج : .....
س : انتم بتعملوا ايه في البيجامات يا اولادي يا حلوين
ج : ......
س : انتم بتعملوا ايه في البيجامات يا حـ ... ات
ج : .....
وبعد ما بتنتهي المواجهة ، ابص لاخويا الصغير و يقول لي زي يونس شلبي لما يقول في مسرحية العيال كبيرت
أنا كنت حاقول
أرد بحزم
يا جاسوس يا تعبان ، أنا حابقى أطفي السجاير في ودانك علشان تتعلم تحفظ السر
و طبعا بما انه الصغير و بيصدق كلامي ، فتلاقيه عيونه دورت و وسعت وقعد بعيد وخوفا من الفتنة اروح اجيب ورقة وقلم و اخليه يكتب تعهد .
في النهاية وصلنا اننا لازم نشك احنا التلاتة نفسنا بدبوس (اياميها ما كنتش اعرف ان فيه حاجة اسمها التيتانوس) و ننزل دم و نكتب بالدم على الورقة و نقسم ان السر محفوظ بيننا ، و طبعا السر محفوظ بيننا لغاية دلوقتي و فضل بيننا أنا و اخواتي كل السنين دي و لغاية من دقيقة دخل معانا في السر الجروب ده (بلييز ، بلييز مش عايزة مامتي الله يرحمها تعرف حاجة )
طبعا نفسكم تعرفوا مامتي و اختي كانوا بيتكلموا في ايه ، الحقيقة احنا عمرنا ما سمعنا كلمة من اللي بيقولوه ، احنا كنا اجبن من اننا نقرب منهم بحيث نسمع الكلام و العيب على العميل 007 اللي ما عرفش يدربنا كويس

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

الاولويات تقلل من الحوادث بس للي مش معقد من حياته

-
  مشكلة المرور الاكبر هو احترام الاولويات يعني لما تكون في اشارة حمراء يبقى الاولوية للي اشارته خضراء لكن لو مفيش اشارات لازم انت نفسك تكون عارف مين يعدي الاول مش علشان هو احسن منك ولا علشان هو ابن باشا او ظابط ولا علشان انت عينيك مش خضراء وشعرك ناعم ولا علشان شبه محمد صلاح الالولويات بيحددها قانون المرور اللي احنا ناس كتير بتعتبره زيادة الفبريكة وسبوبة للي شغالين في المرور تعالوا نناقش الاولويات 1- الطريق الرئيسي بيكون له اولوية على الطرق الجانبية وبالتالي اللي طالع من الطرق الجانبية لازم يبص كويس قوي قوي امتى يدخل في الشارع الرئيسي (طبعا احنا بنعتبر اننا دايما في طريق رئيسي وان اي ح..ر ما يقفش يبقى لا مؤاخذة برضه ح..ر ) 2- لو احنا في طريقين فرعيين يعني انت شارع صغير في تقاطع والشارع اللي بيقطع اتجاهين يبقى الاولوية اللى على يمينك مش علشان هو ابن ناس وانت وحش ولا علشان هو خاله لواء 3- لو احنا في طريقين فرعيين و لو الطريق المتقاطع معاك اتجاهه شمال يعني بيقطع من على شمالك يبقى انت لك الاولوية مش علشان هو وزنه خفيف ولا علشان عاطل عن الشغل ولا علشان مش من كليات القمة و لكن علشان انت ع...
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب...
قراءة المزيد