القاعدة على الشباك

ذكرياتي 25

المرة دي الذكريات مش بتضحك و لكن علشان تعرفوا المصريين كان تأثيرهم قد ايه في البلاد العربية .
انا فاكرة لما كنت صغيرة جدا و كان البيت بتاعنا في شارع اسمه عمر المختار في ليبيا و كان اللي بيعيش فيه اغلبهم من الطليان و الليبيين كنا مش بنشوفهم الا قليل و الكلام كله طلياني و مدام ماري و لاورا و ماورو دول اصحابنا اللي بنشوفهم و بنلعب معاهم
المهم اللي باقولكم عليه ان ماما كانت بتخلينا نبص من الشباك و كنا في الدور الخامس بالمباني القديمة ، يعني بالعملة الحالية ييجي التاسع كده ، المهم ان انا مش عارفة كنا إزاي بنشوف الشارع من الشباك والقزاز مقفول ، لكن كانت ماما لها طريقة لطيفة بتحطني بيها أنا و أخويا الصغير (احنا كنا تحت الثلاث سنوات تقريبا) بحيث ممكن نشوف الشارع و احنا جوة البيت
يمكن كانت بتحطنا جوة قفص مثلا ، لا و إلا يمكن جوه صندوق ، أو يمكن بتعلقنا من رجلينا ، الصراحة بعد أكثر من خمسين .. (اقصد ثلاثين .. لا تمانتاشر ، باقولكم ايه هي تلاتة وخمسين و اللي يزعل يزعل ) اكيد مش فاكرة الطريقة ، لكن يومها كان يوم من اللي فيه مظاهرات كتيرة و بابا ما نزلش من البيت و الحالة تأهب قصوى و انا و أخويا الصغير بنتفرج على الشارع وهو ماليان ناس بتنادي بصوت عالي و انا عرفت وقتها ان اسمها مظاهرة و عارفين في المظاهرة كانوا الناس بيقولوا ايه
ناصر .. ناصر ..
وطبعا عرفت ان ناصر ده مصري
والله الناس في البلاد العربية كانت بتسمي ثورة يوليو بتسميها ثورة ناصر و كانوا بيموتوا فيه و كل اللي شاعر بظلم في بلده نفسه عبد الناصر ييجي و يخلصه من الظلم و كل ما افتكر اليوم ده و الناس عددهم صغير و ماشيين في الشارع مش عارفين يهتفوا يقولوا ايه غير ناصر
عرفت لما كبرت ان ده كان تأثير السياية المصرية في الشارع العربي
نفسي المصريين يرجعوا يدوا العالم العربي الأمل مرة تانية و يحسسوهم ان المستقبل حيكون كويس
على فكرة أنا مش ناصرية بالمرة ، انا مصرية وعربية بس