باحب اللبن مهما حصل

ذكرياتي 36

اللبن حبيبي ، أنا باحب اللبن زي عيوني ، على عكس كل الأطفال اللي عرفتهم في حياتي ، أنا فعلا باحب اللبن الحليب و ياسلام بقى لو لسة مغلي و طعم القشطة فيه و إلا لما نشيل القشطة من عليه و نحط عليها العسل الأسود و نغمسها بالعيش الفينو ، أو الفطير ، المهم على كل هذا العشق لكن كنت باكب كوباية اللبن كل يوم
كووووووووولللللللل يوووووووووووووم
و الله مش باهزر
كل يوم اقف على الكرسي و الترابيزة عليها الفطار ، إشي عسل ، إشي جبنة و الأطباق محطوطة و ماما كانت بتتفنن في الأصناف و هي محطوطة بعيد عن بعض و أنا للأسف الشديد عندي عادة ما بتتغيرش ، لما أشوف حاجة لازم أدوقها ، وعلى السفرة فيه ميت حاجة و لازم أدوقهم و كل ده و أنا بأحكي لأخواتي شوية مواقف على حبة حكايات المهم في نصف الموضوع تلاقيني حركت ايدي كدة و إلا كدة و كوباية اللبن هوبااااا وقعت على السفرة
في الأول كانت مامتي بتغسل المفرش كل يوم
بعد حوالي شهر و بعد ما استنفذت محاولات اقناعي بشرب اللبن أول ما أقف على الإفطار و نتيجة إن أنا بأحب آخر حبة لبن يبقوا مع آخر لقمة فلذلك ما ينفعش أشرب اللبن الأول ، المهم إن بعض شهر ماما قررت انها تبدل المفرش القماش بمفرش مشمع و أنا فاكرة شكله جدا ، كان فيه كريز و فواكه و ناحية مشمع و ناحية زي القطيفة و إلا الجوخ و حتعرفوا أنا ليه فاكراه بالتفاصيل
و في يوم من ذات الايام وقفت الصبح و ماما بتقول لي ، النهاردة أنا مش حاسمح انك تكبي اللبن ، أنا حأخليكي تشربيه من على المفرش المشمع
هي عشر دقائق و كوباية اللبن هووووب
اندلقت على المفرش المشمع و اصحاب الخير(اخواتي الأولاد) في نفس واحد
ماااااماااااا اللبن اتكب
بصوت يجيب اسكندرية كلها
ماما في ثانية كانت موجودة و فضلت تشيل هي و الشغالة كل الأطباق و الأدوات المنزلية الموجودة على المفرش و فضل المفرش فاضي و عليه ربع كيلو لبن
وبصت لي و قالتلي :
ياللا أشربي
انا بصيت للمفرش و لماما و قعدت أضحك و أنا عايزاها تضحك و نفسي احس انها بتهزر ، و اضحك اكتر علشان أوضح لها إن الطلب اللي بتقول عليه مش معقول
و طبعا بعد دقيقة الضحكة وقفت و ماما بتهز راسها لفوق وتحت يعني أيوه
وأنا بابص لها و اهز راسي يمين و شمالي يعني لأ
طبعا لأن مامتي أكبر مني بكتير و لأنها قائد القوات المنزلية و الرتبة الأعلى فطبعا كان لازم أسمع كلامها و ابتدي أشرب ومنين ، من على المفرش
الأول عملتها بضحك و عملت زي القطط و بلساني و بدأت أشرب
وبعد فترة ما كنتش باضحك لاااا
كان اللبن بدا طعمه يبقى غريييب
المفرش المشمع معروف انه بيحتفظ برائحة مميزة
ريحة صابونة المطبخ اللي بيتمسح بيها (مكانش فيه بريل ايامها ، كان الصابون بتاع المطبخ اللي مكعب)
وطبعا مكانش فيه هزار ، ياللا بقى كملي الكوباية من على المفرش و طعم اللبن غرييييييب
في النهاية خلصت كوباية اللبن من على المفرش و بعد كدة أول ما أصحى الصبح أقوم أِرب كوباية اللبن و بعدين أصبح على العائلة و أفكر أعمل أي حاجة
لكن لسة باحب اللبن برضة زي عيوووووني