مملكة على وشك الانهيار

-


ذكرياتي 43
كانت العابنا انا و اخواتي لازم فيها بعض التمثيل على حبة خيال وده لان مفيش نينتيندو و مفيش فيديو و مفيش سي دي و مفيش دي في دي و مفيش آي بود و ....
يبقى ايه
العاب تعتمد على الخيال
اللعبة اللي تغلبت على كل الالعاب هي لعبة الملوك
كانت كل الحكايات و كتير من الأفلام بطولتها ملك و جنبه الراجل اللي في ايده ريشة طوييييلة و من افريقيا العظمى و طويل واسمراني جدا جدا و برضة الطبق اللي مليان فاكهة من عنب وتفاح و موز ويروح الملك مادد ايده وواخد عنقود عنب كبير ويحطه فوقه و يقربه من بقه و يمسك بعد كدة دبوس الدندي او يمكن حتة الفخذة الضاني ويقطم منها واللحمة يطلع منها حتة من جنب بقه و بعدين يمسك الكاس المعدن و يشرب منه الخمرة وتتدلدق منه و يمسح بقه بايده وهو بيضحك ملئ شدقيه
كل الصورة دي كنا عايزين نكررها مع بعض و لذلك قررنا ان احنا نلعب لعبة ان كل واحد مننا يكون ملك يوم والتانيين يكونوا الرعية
و طبقا للاقدمية اللي كلنا بنتبعها بأمانة في منزلنا العامر فاخويا الكبير بدأ وكان هو الملك لأول يوم وكان يوم .... حقيقي عرفت معني يعز من يشاء و يزل من يشاء
اولا صحينا و ماما كانت دايما بتبقى محضرة الفطار على السفرة و الاكل سخن لان ماما من امهات زمان اللي الغذا فيه مهم و الاولاد لازم يبان عليهم العز و لذلك ممكن تلاقي سد الحنك و البيض بالعجوة و النقيطة او البانكيك بتاع دلوقتي بس بالعسل و السمنة البلدي و غيره و غيره و وصلنا للسفرة وكل واحد مد كرسي و بدأ يمد ايده و لقينا اخويا الكبير بيزعق ويقول
انتم اتجنيتوا .... انا الملك ... قوموا ياللا
انت امسك لي الفوطة
وانتي امسكي الكوباية
مش حتاكلوا الا لما اخلص و اديكوا الأمر
طبعا سمعنا الكلام ، ما هو كل واحد عليه الدور
وريقنا يجري مفيش مشاكل و الأكل يبرد و ماله
خلص الفطار و بدأنا ناكل لكن مين
انا الملك واحد ييجي يعمل لي مساج
انا الملك ورحي هاتيلي الروب من جوه
رجلي واجعاني اقعدوا على الأرض و يحط رجليه على كتافنا و احنا بنجز على اسنانا في انتظار دوره علشان نطلع فيه كل اللي بيعمله فينا
وانتهت الليلة و انا و اخويا الصغير منهكين من طلباته و حمدنا ربنا ان الليلة خلصت و جاء دوري و لكن طبعا بما انهم اولاد يبقى البنات في الآخر ووافقت ان اخويا الصغير ياخد دور قبلي
صحينا الصبح ولقينا الفطار على السفرة وطبعا ما قعدناش اتباعا للقواعد اللي حطها اخويا الكبير و قعد اخويا الصغير ياكل وبدأ اخويا الكبير يكلمني بصوت عالي :
" الملك الظالم ياكل و يسيب شعبه جعان "
بص اخويا الصغير لقى اخويا الكبير و تعابير الجوع الشديد على وشه
راح على طول قال لنا :
تعالوا يا شعبي الحبيب كلوا معايا ، انا لازم اشارك شعبي معايا
و قياسا على ذلك كل ما يطلب حاجة مننا يلعب اخويا الكبير على وتر العدل و انتهى اليوم ان الملك العادل تقريبا كان ناقص يخدمنا
اليوم الثالث
انا الملك ، قالولي لااااااااااا
انت الملكة
طب ايه الفرق
الفرق ان احنا اللي ندلعك
خليكي في السرير ونجيبلك الأكل لغاية عندك
فضلت في السرير و ان الاكل ييجي ابدا وفي الآخر (طبعا بعد ما شبعوا) جابولي سندويتش و قالولي نأكلك علشان ما تتعبيش
و يدفسوا الاكل في بقي
ما علينا ، خلصنا الأكل وجيت أقوم قالولي ابدا احنا حنريحوكي
وحابوا كل الغطيان اللي في البيت وهو حطوها علي
اف الدنيا حر
لا لا لا ما تقوميش احنا حنهويلك
وفي النهاية قمت من تحت الغطيان و قلت لهم
انا مش لاعبة و لا عايزة ابقى ملك ولا حتى غفير
تاني يوم اخويا بيقول هه الدور علي
انا كنت عند جارتنا
واخويا الصغير في الشارع حنب البواب
ودي كانت نهاية مملكتنا

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد