سهر الليالي

ذكرياتي 4
حكيت لكم على حماية الأخوة من الهنود الحمر و لكن الليلة التانية كنت واعية ولئيمة و قلت لهم مفيش نوباتشيات ، هو شيفت واحد كلنا في المساء نفتح عيوننا وقال إيه لازم ناخد بالنا من المنافذ كلها لحسن واحد هندي احمر يدخل من الشباك بدل الباب و واحد من الشباك التاني المهم وافقوا وقالولي خلي بالك من الباب و احنا حناخد بالنا من الشبابيك و كل واحد نام على جنب في سريره وهو باصص على جنب و أنا نصف نايمة لأن الباب كان في الوش ، عدت الربع ساعة الأولى و اخويا الصغير ربنا يحميه بدأ يشخر و أنا كلمت اخويا الكبيرو قولت له شايف بقى مفيش مسئولية ، يعني ده بقى يحمينا ازاي وهو نايم كده و اكد اخويا الكبير ان العملية دي مهمة و لازم بقى ان احنا نقسم الشباك علينا و انا قلت له انا كل شوية حاكلمك علشان ما تنامش و هي نصف ساعة و لقيت نفسي باحرس الثلاث منافذ والصبح طلع و قررت ان مفيش حاجة اسمها هنود حمر في اسكندرية من أصله و اللي خايف هو اللي يصحى و تصبحوا على خير