لعب الكرة مع النجفة

ذكرياتي 15
كنا بنلعب كل يوم بالكورة انا و اخواتي و كان عندنا كوريدور طويل و في وسطه نجفة نوعها صيني ، يعني لونها احمر و مستطيلة و لها شراشيب طويلة و كان بابايا بيستخدمها علشان تبقى وناسة للمساء لأن أخويا الصغير مش بيحب الضلمة و في يوم من ذات الأيام اللي بيحصل فيها حاجات كتيرة ، يومها حدفت الكورة و اخويا لقفها و حدفها اخويا في النجفة و لقينا النجفة تحت في وسط الكوريدور و لله الحمد الزجاج داخل النجفة فضل زي ما هو
المهم ان مامتي كان برة بتشتري حاجات و احنا كان لازم نرجعها زي ما كانت قبل ما تيجي ، و الحل ندور على سلم ، في الآخر طلب اخويا مني ان اجيب السلم من جارنا ، في طرابلس كنا في حتة ما فيهاش عرب كتير ، الأغلبية طليان و احنا كنا بنعرف طلياني و لكن للأسف جارنا القريب و الوحيد كلمته بالطلياني طلع ارمنلي و انا ما عرفتش امثل قدامه السلم لان الوقت سرقنا و بالتالي رجعت لقيت الاخين الحلوين اتصرفوا و ربطوا السلك زي العقدة و بالتالي النجفة قصرت جدا جدا و قربت تلزق في السقف
كلنا قعدنا مستنيين وصول القادة الكبار ، ماما و بابا و لكن عند وصولهم ..... و بعد ما جم .....
ما حصلش حاجة خالص ، الغريبة انهم طول النهار محدش علق على الموضوع و احنا التلاتة ماشيين نتغامز و نعمل نوباتشية على الكوريدور و جاء المساء وهو وقت استعمال النجفة ، دخلنا السراير و جاء موعد بابا لما يعدي يبوسنا و يولع النجفة علشان اخويا الصغير ما يخافش و دخل بابا الأوضة و راح اخويا الصغير قايل له :
انا النهاردة بقيت شجاع جدااا و ما بقيتش اخاف من الضلمة خالص و مش عايز وناسة
بابا استغرب و قال له : كويس والله ، بس ممكن اولعها لو عايـــــ.......
يجيب اخويا بسرعة : لا لا لا لا لا لا لا لا
بابا : او ا ....
اخويا : لا لا لا لا لا لا لا لا
انا باحب الضلمة
وطبعا طول الليل نضحك على اللي بيحب الضلمة
و لغاية النهاردة أنا مش عارفة امتى مامتي اكتشفت ان النجفة مقطوعة و مربوطة !
هو احنا غيرنا البيت كذا مرة و النجفة موجودة في آخر واحد و شغالة كويس
و اخويا لسة لغاية دلوقتي بيحب الضلمة