الملكة امي
ذكرياتي 38
كنت شفت أفلام ان الملوك عندهم واحد مخصوص لازم لازم يدوق الأكل قبل الملك لحسن يكون حد حاطط له سم و الا حاجةوبما اني باحب ماما و باعتبرها ملكة البيت
و بما اني عندي نظرية المؤامرة (conspiracy theory) فلازم أعمل الواجب و اخاف على العيلة
و لازم اتأكد من ان اللي مامتي بتشربه و الا بتاكله يكون خالي من السموم
و لازم لو كان حد ناوي يؤذيها يبقى يا نعيش سوا يا نموت سوا
المهم ان انا كنت لازم أشرب من أي كوباية بتشرب منها
و آكل من كل أكل بتاكل منه
وكل ده من غير ما أقول احد خالص
ولو حد غيري جابلها مية والا عصير و الا ساندوتش ابقى واقفة و عيني فيه لحسن يكون فيه حاجة و أنا ما دقتوش الأول بحيث لو ماما سابت للقمة أكلها ، زي ما قلت يا نعيش سوا يا نموت سوا
المهم ان ماما كانت مش فاهمة ايه اللي بيحصل وكان زمانها بتقول لروحها
هي بنتي اتفجعت فجأة و بقت طول النهار عمالة تشرب و تاكل من حاجتي
مش فاكرة السبب اللي خلاني ابطل الموضوع
يمكن علشان كان لازم اشرب قهوة من ماما و انا مش باحب طعم البن المحوج
الحصيلة اني اكتشفت ان مفيش حد حوالينا نفسه يؤذي امي و انا كمان رحت المدرسة و لقيت ان معظم الوقت ماما بتشرب و تاكل من غيري
والحمد لله اللي ما سمعتش عن خالد ابن الوليد و انه بيشرب كميات صغيرة من السموم علشان جسمه ياخد منها مناعة
كان زماني دلوقتي عاملة بتاع عشرين غسيل معدة و كنت زماني من الزباين المهمة في معهد السموم و العيب على الخيال الواسع منه لله كان تاعبني جدا
تعليقات
إرسال تعليق