اولاد سيدنا ابراهيم

في سورة الانبياء ربنا سبحانه وتعالى بيعرض علينا الاحداث اللي اتعرض فيها الانبياء للفتن وان ربنا وقف جنبهم
في قصة سيدنا ابراهيم بعد ما اتعرض للحرق ونجى كان معاه قريبه لوط وهربوا وراحوا في الغالب منطقة فلسطين لان ربنا بيقول
اعوذ بالله من الشيطان الرجيم
وَنَجَّيْنَاهُ وَلُوطًا إِلَى الأَرْضِ الَّتِي بَارَكْنَا فِيهَا لِلْعَالَمِينَ
والارض اللي ربنا بارك فيها كانت على ما اعتقد مكان المسجد الاقصى
المهم ان ربنا نجاه هو ولوط
وبعدها خلف اسحق ويعقوب
وَوَهَبْنَا لَهُ إِسْحَاقَ وَيَعْقُوبَ نَافِلَةً وَكُلا جَعَلْنَا صَالِحِينَ
هنا كلمة نافلة بيقال ان اسحق ابن ويعقوب حفيد
كلنا عارفين ان اسحق جاء لسيدنا ابراهيم على كبر وان السيدة سارة كانت مش متوقعة انها تحمل وتخلف ولكن بشارة الملائكة اللي كانوا رايحين لعذاب قوم لوط بلغوها بالخبر وفي القرآن بيذكر سيدنا يعقوب وكانه ابن وانا اعتقد والله اعلم ان سيدنا اسحق تزوج بدري وانجب في سن صغير بحيث بالنسبة لسيدنا ابراهيم كان الفرق بينهم مش كبير المهم انهم الاتنين كانوا مع سيدنا ابراهيم وكلمة نافلة يعني حاجة زائدة وممكن هدية
في الاخر ربنا بيقول
وَجَعَلْنَاهُمْ أَئِمَّةً يَهْدُونَ بِأَمْرِنَا وَأَوْحَيْنَا إِلَيْهِمْ فِعْلَ الْخَيْرَاتِ وَإِقَامَ الصَّلاةِ وَإِيتَاء الزَّكَاةِ وَكَانُوا لَنَا عَابِدِينَ
طبعا الكلام مش بس على سيدنا اسحق وسيدنا يعقوب لان الكلام جمع مش مثنى واعتقد ان الكلام يشمل سيدنا ابراهيم وسيدنا لوط وممكن كمان سيدنا اسماعيل