ربنا بيبعت الدفا

صباح الجمعة المباركة
في سورة الكهف ربنا سبحانه وتعالى كان بيرعى الشباب اللي هرب بدينه من المجتمع ونبص في الاية
اعوذ بالله من الشيطان الرجيم
وَتَرَى الشَّمْسَ إِذَا طَلَعَت تَّزَاوَرُ عَن كَهْفِهِمْ ذَاتَ الْيَمِينِ وَإِذَا غَرَبَت تَّقْرِضُهُمْ ذَاتَ الشِّمَالِ وَهُمْ فِي فَجْوَةٍ مِّنْهُ ذَلِكَ مِنْ آيَاتِ اللَّهِ مَن يَهْدِ اللَّهُ فَهُوَ الْمُهْتَدِ وَمَن يُضْلِلْ فَلَن تَجِدَ لَهُ وَلِيًّا مُّرْشِدًا
فيه ناس بتقول ان ربنا خلى الشمس تدخل عليهم مخصوص وفيه ناس قالت ان الكهف فيه فتحات في اتجاه شرقي غربي بحيث تدخل من الشرق ومن الغرب ولكن في النهاية ربنا بيقول
ذلك من ايات الله
يعني ربنا بيقول انه هو اللي ظبط لهم الموضوع ده
دول شباب يعني في سنهم الشباب عايزة فورمة الساحل وعندهم مارينا والا هايسيندا والا اي موضة من الموضات ولكن دول كانوا غيرانين على ربنا وعلى ان الناس بتعبد غيره وقرروا البعد عن الناس والفتنة راح ربنا هيئ لهم من امرهم مرفقا وكان لهم وليا مرشدا
الخلاصة
لو هربت لربنا من الناس حيبعتلك الشمس تدفيك من اليمين ومن الشمال وحيكون لك وليا مرشدا