سعرات تعليمية

-
بالنسبة للطريقة التعليمية اللي ان شاء الله بنفكر نعملها في المدرسة المجتمعية في نجع العون
حنعمل فكرة الوحدة التعليمية زي السعرات الحرارية كدة
يعني انت محتاج كام وحدة تعليمية علشان تبقى متعلم
طيب اللغة العربية فيها كام وحدة تعليمية
لو اعتبرنا ان المعلومة الواحدة تعتبر وحدة تعليمية يعني مثلا درس النكرة والمعرفة يعتبر وحدة تعليمية ولما يفهمها كويس يبقى كانه اكلها وحرقها وفي اي وقت ممكن يعرف الفرق وده انا لاحظته في التنوين مثلا ناس كتير مش بتعرف امتى احط التنوين وامتى احط التشكيل وده مرتبط بالنكرة والمعرفة
طيب لما انا درس النكرة والمعرفة اعتبره وحدة لازم يعرفها كويس وياخد عليها تدريبات ويفهمها وبعديها يعتبر عدت عليه وياخد ختم عليها في كراسة الوحدات التعليمية للغة العربية وبكدة يبقى عدى واحد من الف وحدة مثلا
ساعتها الطالب حيبقى معاه كراسة للغة العربية كلها مربعات داخل كل مربعة اسم الوحدة وفيها مكان للمعلم علشان يختم ان اللي معاه الكراسة دي اتعلم الوحدة دي
طيب تعالوا بقى
اللغة العربية فيها كام وحدة
مثلا لو الدرس فيه وحدة والاطفال بتاخد درسين عربي في اليوم يبقى في خلال عشر شهور او اربعين اسبوع على اعتبار ان فيه اجازات وفترات امتحانات يبقى السنة الواحدة فيها اربعمائة وحدة تعليمية
ولازم الطالب يعدي عليهم علشان ياخد المعلومات المطلوبة منه خلال العام ولكن لان اللغة العربية درجات ومستويات فممكن تكون اللغة العربية محتاجة اربعة الاف وحدة تعليمية ودي مش مطلوبة منه ولكن اللي عايز ممكن ياخدها كلها
وبالمثل في الرياضيات
برضه كراسة فيها الوحدات التعليمية
بس حيكون فيه شرط ان فيه وحدات رئيسية وفيه وحدات تكميلية
يعني مثلا الفعل والاسم وتكوين الجملة وغيرها دي حاجات لازم اي واحد بيتعلم عربي لازم ياخدها وبالتالي تكون شرط انك تاخد اي وحدة تعليمية
او الجمع والضرب مثلا ما ينفعش اني اخد حل معادلات او الهندسة من غير ما اعرفهم
كمان ممكن يكون فيه شهادة فيها الوحدات المطلوبة للمرحلة الابتدائية او التمهيدية للتعليم وده عن طريق جدول يتحط فيها الوحدات المطلوبة الاساسية ومعاها اللي يطلبه الطالب بحيث لا تقل عن عدد من الوحدات اللي تخليه على درجة من العلم تكفله ان يكون مثقف
ده شكل مقترح للتعليم المفتوح المجتمعي وبالتالي ممكن واحد ياخد 8000 وحدة تعليمية في ثلاث سنوات وفيهم وحدات العربي والعلوم اكثر من واحد تاني واخد الرياضة والتطبيقات البيئية مثلا
لسة الموضوع بنحاول نبلوره وباذن الله يطبق في تعليم اولادنا في نجع العون والقرى المحيطة به

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد