الصمت الرهيب

اشتريت برنامج بتاع هوميوباثي اصلي من اللي هو بتاع بلاده وجالي على فلاشة ومعاه الدونجل بتاعه زي الناس المحترمين وحطيته على اللابتوب ورحت اجيب كوباية الشاي علشان ابدأ انزله قوم لقيت الفايروول مسح ملفين اللي بيشغلوه ومن غير ما يسأل قال ايه حضرته خايف على الجهاز بتاعي ياخي جتك ستين خيبة مين قالك تخاف على الجهاز ده بتاعي مش بتاعك ومسحهم من غير اذني قعدت ازعق للجهاز واقول له انت مالك انت ومش عارفة اضحك دخل علي جوزي فيه ايه قلتله الملفات اللي بتشغل الفلاشة اتمسحت طبعا مش عايزة ابص ناحيته لانه عارف ان البرنامج قرب على العشرتلاف ومش طالباها تنبيط على اني مش .... ولا انا باخد بالي من .... ولا المفروض اكون حريصة على .... بس لقيته هادي قوي وقال لي انتي استعجلتي وخرج من الاوضة بهدوء بقيت باصة للجهاز ومش عايزة اتلفت قال يعني عادي مش مشكلة واتعشينا واتفرجنا على فيلم ولا كأن قعدت اعمل نفسي باكح علشان اصعب عليه وحركات بتاعة الاطفال اللي بيضحكوا على اي حاجة علشان يداروا على اللي حصل المهم مش عارفة هل هو الهدوء الذي يسبق العاصفة والا الهدوء بتاع مفيش فايدة مهما عملت والا الهدوء بتاع استني علي انا حاليا بانزل البرنامج من سكات على ما يوصلني الباسوورد واليوزر نيم ان شاء الله حيشتغل بس قاعدة زي الكروكس قدام الشاشة مش عايزة ابص يمين ولا شمال لغاية لما البرنامج ينزل كان ايه لزمته الشاي يعني هو الهوميوباثي ما يمشيش من غير كافيين والا ايه #الصمت_المخيف