شوية قرآن بتاع بالليل

ما جبت بنتي الجميلة ماهينور كان باخاف عليها لان الدنيا كلها شرور لدرجة اني قبل ما اتجوز كنت فكرت ما اجيبش عيال لان حيعملوا اهي في الدنيا دي وده ايه لما كنا في الزمن الجميل زي ما الناس بتدعي ما بالك اليومين دول وحتى كنت اطلب من ربنا انها تبقى تحت رعايته ونذرتها له وهي في بطني
من خوفي كنت كل يوم وانا بانيمها اقرا لها قصار الصور بعد ما اغنيلها اغنية واياميها كان الحذيفي منزل القران كامل فكنت افتح لها شريط للحذيفي في الجزء الثلاثين واسيبها
اللي عملته جاب نتيجة جميلة بدون ما اقصد
بنتي اتكلمت كلام صحيح بدون اخطاء اسرع من الاطفال التانية وكانت حافظة قصار الصور كلها في سن ثلاث سنوات
المقصود من القصة دي
اولا : اما تخاف سيبها على اللي ممكن يحفظ لانك مهما كنت مش حتقدر
ثانيا : سماع القرأن كل يوم بيحسن اللغة والقدرة على استيعاب كلام كتير من العربي
ثالثا : مفيش سن تقول ده بدري على حفظ القرأن انا مكنتش عارفة انها حفظت الا بعد ما حمايا الله يرحمه قال لي بنتك حافظة كل قصار الصور ياكوكا
ازاي يا انكل
جابها وخلاها تقرا وهي بتقول وقال لي شايفة راحت قايلاله لا يا جدو لسة اية الكرسي
رابعا :
شوية القرأن بتوع بالليل قبل ما الاولاد تنام تحفظهم حلو قوي والله جربوها ان قبل النوم سيب اللي في ايدك وتعالى اقرالك شوية قران مع الوقت بيشعر بانه مع قوة اعظم وبتحسن حياته لان بتضيف فيها اطمئنان