رضينا بالهم والهم مش راضي بينا

نظرا لأني امرأة تعمل فلازم يكون معايا مساعدين
مش المساعدين بتوع العربية لا ابسلوتلي بالعكس مساعدين بتوع المطبخ اقصد شغالة وبالطبع ده مشكلة كبيرة تعاني منها الأسر المنتجة وحتى المش منتجه
الشغالة هي امرأة تخرج من بيتها لتنظر بيت امرأة اخرى مقابل المال وهو عمل شريف لكن للأسف معظم وان كان كل الشغالات يعتبرنه سبة وشتيمة وعيب وما يصحش وكل الشغالات يدارين عملهن لان ياخرابي لو جوزي عرف والا لو جوز بنتي والا الجيران وكان الفلوس اللي بتقبضها دي بتنزل من السما
نرجع للشغالة اللي جت تشتغل عندي
اول يوم جت الصبح وقلت لها حضري لنا الفطار لو سمحتي
ورحت أغير عشان أفطر أنا والأولاد وقبل ما أوصل الاوضة لقيتها بتقول خلاص
قلت دي لهلوبة على كدة
رحت أوضة السفرة لقيت طبق فول وكام رغيف عيش

الله ايه يا ستي فين الأطباق والملاعق والسكاكين والجبنة والعسل والمربى والبيض
ووريتها ان سفرة الإفطار لازم تتوضح ازاي
بعد حوالي ساعة لقيت واحدة بتنادي بصوت جهوري
حمااااادة حمااااااادة
جريت لها
فيه ايه ومين حمادة
قالتلي
 بنادي عليكي، عايزاني اعمل ايه
قلت لها روحي على الحمام وتبتدئ بيه
دخلت الحمام ورجعت تقول لي
أجيب الميه منين
قلتلها من الحمام أكيد ما الحمام فيه ميه
بعديها وقفت معاها افهمها ان الكنس له مكنسة وان الموبيليا لها فوطة وان المسح له خيشة
قالتلي طب ومين حيمسح انا في البيت بناتي بتمسح لي الارض
قلتلها كنتي جبتيهم معاكي يا شيخة
بعد شوية قلتلها ممكن تحضري الغدا وكان الحمد لله فيه اكل
وقلت اسبق واقولها
حطي الاطباق والشوك والمعالق والسكاكين وسخني الاكل
قالتلي باندهاش
اطباق تاني ما تاكلوا من الحلة
المهم ان اليوم ده عدى على خير
تاني يوم جاءت وانا رحت الشغل ورجعت لقيت بنتي بتجري علي وتقول لي ماعرفتش اذاكر ولا كلمة
قلتلها ليه
قالتلي الست اللي عندنا كل شوية تقول لي انتي قاعدة تذاكري وسايباني لوحدي
قالتلها وانا مالي انا عندي مذاكرة
قالتلها عيب تكلمي طنط كدة ولازم تساعديها
المهم ان انا لما دخلت المطبخ لقيتها ماسكة كتاب وورقة وعمالة تقرا وتذاكر
قلتلها بتعملي ايه
قالتلي اصل لازم عشان اشتغل في مدرسة يكون معايا محو امية وانا عايزة امتحن عشان ربنا يتوب علي من الشغلانات اللي في البيوت
قلتلها خلاص روحي ذاكري في بيتكم وسيبك مني خالص لان مش حينفع نكمل مع بعض
بصت باحتقار شديد لي وللاولاد وللبيت وقالت
صحيح رضينا بالهم والهم مش راضي بينا
وخرجت من البيت وضحك الجميع وعشنا في تبات ونبات