زيارة ماما نويل

اسرتي الجميلة تتكون من اب حنون جميل ما يطلعش العيبة من بقة وآخره لما يزعل من واحد وعايز يشتمه يقول عليه " ثقيل" و بالثاء مش بالتاء ولو عايش وشايفني وانا واخده راحتي كان وداني العباسية عند العسكر وش
وامي الحازمة تركية الجذور العنيدة والتي لا ترضى عن الكمال بديلا والكمال يبدأ بالملبس وطريقة الاكل والكلام وحفظ اللسان وحتى اللعب والله الحزم في اللعب يعني الكوتشينة تتلعب باصول ومن ضمن الاصول ان الغسيل ما ينفعش يتحط في اودة النوم لانه لسة مندي وعايز ينشف كمان شوية وكانت دي من خناقات مامتي المعروفة مع ام محمد الشغالة بتاعتنا لما تشيل الغسيل مندي "طاله الندى للي مش مصري"
وممنوع القطط في البيت لانها ممكن ما تكونش ملتزمة مثلا وتخربش في العفش وحاجات كتير
المهم ان اخويا الكبير وانا كنا في الكلية مع بعض لوحدينا في اسكندرية لان والدي ووالدتي واخوتي كانوا في بلد تانية
انا خلال فترة عيشتي مع اخويا يعلم الله كنت مثال الالتزام خارج البيت لكن جوه البيت براحتي يعني مش لازم القوانين الصارمة بتاعة مامتي وهو كمان كان مثال الالتزام برة البيت بس جوة البيت براحته مش لازم قوانين والدي الصارمة
ايه يعني لما الشغالة تحطلها كام ملاية على فوطة عشان يكملوا تنشير في البيت مش مشكلة الدنيا مش حتتهد
ايه يعني لما اربي قطة في البيت عشان الاقي حد يتمسح في رجلي لما ارجع من الكلية
ايه يعني لما استخدم شال مامتي عشان القطة تقعد جواه تتدفا
ايه يعني لما اخويا يشرب سجاير ويحاول يبطل على مدار سنوات الكلية وما يقدرش
مرت سنوات الكلية بسلام وفي سنة من السنوات يا احبائي الكرام
روحوا جيبوا شاي عشان الحكاية حتبتدي
في سنة من السنوات وفي يوم 31 ديسمبر عام 1975 وفي ليلة ممطرة العالم كلها بتتفسح وانا واخويا قاعدين في البيت ساقعانين
هو بيشرب سجاير وبيبص على العلب الفاضية اللي مترصصة على المكتبة وهي دي طريقته في الاقلاع عن التدخين انه يحط كل علبة بتخلص قدامه عشان يعرف قد ايه صدره حوش قطران وقد ايه دمه اخد نيكوتين وقد ايه بيصرف على تلك العادة البشعة
هو بيشرب السيجارة وبيبص على العلب وانا بالعب بقطتي الرخمة لانها فعلا كان دمها تقيل حبتين بس مش مشكلة
والساعة قربت على منتصف الليل ونسمع جرس الباب
بصينا لبعض
انت مستني حد
يرد : لا
وراح يفتح الباب وبيبص من العين السحرية ويلاقي مين
البواب ومعاه شنط سفر
مين يا عم
الست الحاجة جت
مااااااااااامااااااااااااااا
يالهوي
يانهار اثوث
قفلنا الباب بسرعة 
وراح جري يطفي السيجارة  بسرعة ويفتح كل شبابيك البيت
وانا جري احبس القطة في اوضتي
والباب خبط مرة كمان
بسرعة فتحنا الباب
ماااا مااا حبيبتي حمد الله على السلامة
واشرف يحضن وانا ابوس
وماما سيبوني عايزة ادخل ونسلم جوه
ماا ماا حبيبتي
حمد الله على السلامة وبوس واحضان
راحت مامتي بحزمها المعتاد
بااااااس انا عايزة ادخل البيت
كله ضرب تعظيم سلام ودخلت بيتها ومطرحها
اخويا واقف بحيث ما تشوفش المكتبة وانا قاعدة جنبها ومش عايزة القطة تطلع نفس
اقعدي ارتاحي يا ماما ده انا اللي باقول
ادخلي ريحي جوه ده اخويا اللي بيقول
انا خايفة تدخل تلاقي حاجة القطة في اوضتها وهو خايف تفضل تشوف علب السجاير اللي مترصصه في المكتبة
لكن مامتي قعدت على الكنبة في الانتريه وقالت اما رحلة عجيبة انا بقالي يوم بحالة في المطارات
واخويا يييضحك وانا اضحححك بس بصراحة مش على الرحلة بس على اللي لازم نعمله في اقل وقت ممكن دون ان تشعر بما يحدث
المهم قلتلها اجيبلك شاي
ورحت بسرعة ولعت على البوتاجاز ودخلت بسرعة لميت غسيل ام محمد من اوضة مامتي وانا طالعة من الاوضة لقيت شال مامتي في الارض عشان كنت حطيته للقطة عشان تتدفى
شلت كل ده وعلى اوضتي عدل وقفلت الباب
ورجعت جبت الشاي لماما وانا سامعاها
ما تقعد يابني بدل مانت واقف
لكن على مين هو واقف يعني واقف
شربت الشاي وبتحكي والقطة بدأت
نياااااو
يادي النيلة عليها وعلى اليوم اللي جبتها فيه
عايزة اقولكم طرق مامتي في التربية
ماما كانت تمسك الموضوع اللي اي حد عمله بالخطـأ وما ادراك ما الخطأ (يعني مش قاصد ولا حاجة ) وتفضل تؤنب له ضميرة وتتكلم على انه تسبب في ... وكان ممكن .... وليه ما عملش .... والناس حتقول .... وتبدأ في سرد اخطاء الماضي كله لما تتمنى ان تنشق الارض وتبلعك
فما بالك لو عارف انت بتعمل ايه
متهيألي كان ممكن تصدر جريدة يومية بكل الاخطاء اللي ارتكبتها من يوم الولادة
شربت الشاي واستريحت واخويا يقول لها
لازم تاخدي دش سخن عشان ترتاحي من اليوم المتعب ده
واخذها من ايدها وعلى الحمام وانا قلت لها ما تدخليش الاوضة انا اجيبلك اللي انت عايزاه لغاية عندك
وجبت الغيار وقميص النوم وكل ما تحتاجه وعلى الحمام
مامتي طبعا كانت حاسة بالترحيب الشديد وكل ده معتبراه فرحتنا بالمفاجأة واحنا بالفعل كنا فرحانين بس ساعات القلق بيغطي على كل حاجة ما تشوفهاش
دخلت اوضة النوم وماما بتستحمى اراجع كل ما في داخل الحجرة عشان ما يسقطش مني حاجة كدة ولا كدة
واخويا في لحظة كان في حجرة المكتب بيلم كل علب السجاير عشان يرميها من سلم الشغالين
وانا مسكت القطة ورميتها انا كمان على سلم الشغالين وهان علي ايام ما كانت بتغلس علي وتخربشني في رجلي كل ما اقعد ونسيت لما كانت بتوسخ اوضة الصالون بمخلفاتها القذرة
اخويا جاب العلب الجديدة اللي لسة ما شربهاش وفتحها ورماها فرط على السلم مش عارفة ليه الصراحة عايزة اسأله ما كان رماهم علب بحالهم احسن
وسمعنا الباب بتاع الحمام بيتفتح
في اقل من ثانية احنا الاتنين واقفين قدام الحمام وبصوت واحد
نعيما
ماما الله ينعم عليكم ياللا اروح انام
امسكت بكل ما ترتديه مامتي وقلتلها ما تنامي عند اخويا النهاردة وكلنا ننام مع بعض عشان وحشاني
طبعا مش عندي لان الغسيل عندي ومش عندها لان ممكن اكون سايبة حاجة وناسية حاجة
اخويا بص لي ومش فاهم
اصل اوضتك بقالها مدة مقفولة واكيد محتاجة تهوية
خفت لحسن تقول لي طب عندك
المهم هي قالت سيبوني بقى انا حانام مكان مانا عايزة روحوا شوفوا حالكم
وبالحركة البطيئة اتجهت مامتي لحجرة النوم
وضربات قلبي تزداد قوة
رحت لاوضتي كان مفيش حاجة غلط
وبعد دقيقة سمعت صوت ماما بتنادي
كوكاااااااااااا
جالك الموت يا تارك الصلاة
رحت بالحركة البطيئة والخلفية صوت ضربات القلب
نعم يا ماما
لقيت ماما في السرير وقالتلي
طفي النور انا عايزة انام تصبحوا على خير
طفيت النور واستمريت انا واخويا بنراجع في الاماكن المختلفة في البيت يمكن يكون فيه مصيبة مستخبية في حتة وانا كلمت بنت خالتي عشان تاخد القطة لانها مش متعودة على اكل الزبالة