الامهات مش لازم تذاكر

الامهات في مصر من ضمن الروتين
الاولاد يرجعوا من المدرسة
تشوف عملوا ايه وعليهم ايه ويذاكروا ايه وفي النهاية تقعد هي تذاكر لهم وتذاكر معاهم واليوم يعدي كله قدام المكتب او على السفرة عشان ابني ذكي ما ينفعش يجيب نمرة وحشة في الامتحان ولو جاب تبقى المدرسة بتضهده
انا مش من الامهات وبالاخص مش ام مصرية كل حياتها ان اولادها يجيبوا النمر النهائية انا غالبا اب وانا مش واخده بالي
كل ما كنت اقعد مع امهات من سني الاقي الامهات بيتكلموا على منهج العربي وان الوزارة بتنزل حاجات صعبه للاولاد وانا اساسا مش عارفة المنهج العربي ايه ولما اخش في الكلام واقول للامهات الاولاد لازم يعتمدوا على نفسهم ويذاكروا لوحدهم اشوف نظرات كلها معاني والكل يبص لي وفي باله هي شارية دماغها ، المفروض ان الام زيهم لازم تقعد مع الاولاد زيهم تذاكرلهم زيهم والا تبقى مش ام او ام مش كاملة الاوصاف
المهم قررت في يوم اعمل زيهم وقلت للاولاد ياللا وروني عملتوا ايه في المدرسة النهاردة واخذتوا ايه وعليكوا واجب ايه
طواعية الاتنين جابوا الشنطة وبدأوا يوروني وابني بص لي وقال لي
انتي قررتي تبقى ام والا ايه
قلت له بس يا ولد ان قررت ابقى ام مصرية
ومر كام يوم وانا باعمل الموضوع ده وانتهى ان الاولاد الوقت اللي انا مش معاهم فيه بيسرحوا ويلعبوا وكل واحد مستني دوره عشان اذاكرله او بالاخص اعمل له الهوموورك الواجب المدرسي يعني
بعد كذا يوم قلت لهم باقولكم ايه انا مش امكم ياعيال انا ابوكم
روح منك له لها لهم ذاكروا لوحدكم واللي مش عارف حاجة ييجي يسألني انا مش مستعدة اثبت لنفسي اني اجدع من المدرسة
وفعلا جالي كام سؤال لازم اشرحه
واحد في الحساب (math) وعلى اعتبار اني مهندسة حتى النخاع فكان سهل علي الحل واستغربت جدا طريقة المدرسة في الشرح
المدرسة قالتلهم في المسائل اللي مطلوب فيها عدد او كمية اقسم الرقم الكبير على الصغير
نعم ياختي
الرقم الكبير على الصغير
اهو ابني احتاس لما لقى كذا رقم كبير وكذا رقم صغير
قلت له ابسلوتلي بالعكس
انت لازم تعرف المسألة بتتكلم عن ايه واعطيته فكرة الضرب المتعامد عشان يعرف يحل اي مسألة حسابية لان دايما يديك 3 ويطلب الرابع وفهمته الموضوع وانتهي ان ابني من بعدها بقى مضطهد من مدرسين الحساب لان كل واحد فاكرة بياخد درس عند التاني وبيذنبوه كل يوم لما يعرف يحل
ايه المعايير البايظة بتاعة المدارس عندنا
المهم ان اصحابه كان نفسهم يتذبوا زي ابني وكل واحد راح لمامته وقال لها انا عايز ابقة زيه ما اخدش دروس واعرف احل واتذنب
والامهات كلموني وقالولي بتعملي ايه
كل ده عشان مسأله ما عرفش يحلها مابالك لو مسكت المنهج كله ياماما كان الاهالي شنقوني
السؤال التاني كان صعب علي جدا الصراحة وهو كان في التاريخ
جت بنتي بتقول لي هو حل السؤال ده ان الافضل ان عرابي يردم قناة السويس والا يتعاون مع الانجليز
انا بقى سمعت يردم قناة السويس اتخضيت
لازم تعرفوا ان انا طفولتي لم تكن في مصر وبالتالي لم ادرس التاريخ المصري ولكن كنت عارفة عرابي اكيد
يردم قناة السويس ليه اتجن ده والا ايه
لا طبعا عرابي عمره ما فكر في الموضوع ده
وقعدت اعدد لبنتي اهمية قناة السويس
وقعدت احكيلها عن جوني الانجليزي اللي كان بيعامل المصري زي العبد وان احنا مش ممكن نتعاون مع الانجليز
وفي الاخر بنتي قالتلي
مامي لو سمحتي انا كرهت التاريخ سيبيني احاول لوحدي
قلتلها مش ممكن لازم تسألي المدرسة الحل ايه وبكرة تقولولي
قال يردموا قناة السويس قال
هم اتجنوا والا ايه
تاني يوم رجعت بنتي من المدرسة قلتلها عملتي ايه في قناة السويس قصدي في عرابي قصدي في سؤال التاريخ
قالتلي رحت للمدرسة اسألها عشان مش عارفة الاجابة
قالتلي : " هو مين اللي بيديكي درس خصوصي ، روحي اسأليه "
قلتلها درس خصوصي في التاريخ ...؟؟؟؟!!!!!
قلتلها سيبك من عرابي انا مش باتهدد ان شاء الله ما نجحتي في التاريخ
في الاخر نجحت طريقتي في ان الاولاد بيذاكروا لوحدهم
ابني قلق فكان بيذاكر كتير ويراجع وكل يوم يديني حاجة اسمعهاله والغريبه ان مش كان بيسمع نصوص والا شعر
لا كان بيسمع تجارب العلوم
التجارب بتتحفظ يا عيال ايه الهطل ده انتم بتعرفوا التجربة والنتائج بتاعتها
قال لي ابني باقولك ايه يا مامتي سيبك من تغيير التعليم وسمعيلي وخلاص
في يوم الامتحان بتاع آخر السنة لابني في الابتدائية كنت راجعة من الشغل وتعبانه جدا ولقيت جوزي واقف على الباب بيقول لي الحقي امتحان الساينس قصدي العلوم بكرة ولازم تذاكري لابنك ده قلقان وانا مش باعرف اسمعله ازاي
طبعا فرحت جدا لان مش مطلوب مني غير اسمعله وانا تعبانه جدا ودي اسهل مهمة بالنسبة لي وحتعرفوا ازاي
قلت لجوزي سيبني مع الولد لوحدينا واقفل الباب وروح اتعشي وعشي البنت وعشيني وسيبونا نسمع الولد لازم يجيب نمر كويسة عيب قوي لما يكون والدة استاذ جامعة ووالدته من اوائل الثانوية العامة وهو يجيب نمر وحشة
وقفلت الباب في حجرة نومي وقلت لابني تعالى اسمعلك على السرير
طبعا ده تربيتي ، فبالتالي شك في وشكه في محله
قلتله ياللا هات الكتاب وابتدي سمع وانا حاغير هدومي
قالي تسمعيلي ازاي وانتي مش فاتحة الكتاب قدامك
قلتله ابتدي بس وانا جاية على طول
ما رضيش الا لما اقعد جنبه

نمت على السرير وفتحت الكتاب وقلت له
التجربة بتاعة كذا يالا قول
قال لي مامي وبلهجة فيها شك
سمعيلي كويس
قلت له يابني انت مذاكر طول السنة وباسمع لك كل اسبوع تجارب الاسبوع
مامي  سمعيلي الامتحان بكرة
لما لقيته مصمم
قلت له اوكيه انا حامدد جنبك واديك ضهري واسمع لك
بدأ يسمع التجارب المختلفة وانا بدات انعس وفي الاخر سمعت صوت جاي من بعيييييييد
ماااااامي
فتحت عيني لقيت البيت واقف جنبي وكل العائلة بتضحك
اتاري شخيري وصل لبرة واكتشفوا ان انا نصابة كبيرة ولا باعرف اذاكر ولا باسمع لا بتاعة ليلة الامتحان من اصله