لو عايز ملح ممكن اديك سكر

انا من الامهات الغير تقليديين بمعنى ان الام المصرية تقول لبنتها سيبي المطبخ وروحي ذاكري انا ممكن اقولها سيبي المذاكرة وتعالي نعمل شوية بسكوت
اكيد جوزي ما يعجبوش الكلام ده ولا اخوات جوزي ولا اصحابي ولا قرايبي ولا جيراني ولكن انا باعمل نظرية جديدة مؤداها ان اللي بتذاكر عشان تتخرج وتدور على عريس يطلقها عشان مش بتعرف تطبخ يبقى الاحسن انها تطبخ وتتخرج براحتها بس لما تتجوز تعرف تطبخ
وانا عايزة اعمل لها براءة اختراع
وعشان اطبقها كان لازم اخلي بنتي تحب المطبخ وده اخد مني وقت كثير وراقات
كل يوم لما احضر لهم العشا اقولها تعالي ساعديني وساعات تستجيب لما يكون الموضوع محتاج عك واوقات ما تساعدنيش لما الموضوع يكون عايز مجهود
وفي يوم من الايام كان الاولاد في المطبخ وانا باحضر لهم وجبة شهية وقلت لبنتي ناوليني مضرب البيض وعملت نفسها مش سامعة طب هاتي الملح بصت الناحية التانية لانها شافت اني مش باطلب من اخوها كل الطلبات منها هي بس
وهي كانت مراهقة يعني السن اللي بتفكر امتى تتجوز
فقلت لها ساعديني عشان لما ييجي واحد يخبط على الباب ويقول لي ممكن شوية ملح يا طنط
اقول له وليه ملح
انا اديك السكر اللي عندي
واروح اجيب المأذون وهوبا تتجوزي حد من الجيران
لكن لو ما ساعدتنيش مش حاعمل كدة
بنتي ما ضحكتش واعتبرت اني باقلل منها
المشكلة ان ابني اتخض جامد وفضل فترة فاتح بقه وفي الآخر قال لي
انا عمري ما حاطلب ملح من الجيران ابدا
ومن هنا عرفت ان طريقتي فشلت فشل ذريع