امشي اطلع برة

الطفل يبدأ حياته بالفطرة السليمة والفطرة تحتم عليه ان يعيش بكرامة
تخيل انك ماشي في الشارع وراح طالعلك واحد من ورا عامود نور وانت مروح وقالك امش اطلع برة
وشاور على الطريق اللي انت رايحله
حتمشي وانت متضايق وتحس ان كرامتك وجعتك
مع انك ما تعرفوش
وانت رايح في نفس المكان
هو ده اللي اخويا كان بيعمله مع اولاد بنت خالي لما كانت بتسيبهم عندنا
كان يستنى لما الولد يقرر يروح اوضته ويروح مشاور عليها ويقول امشي اطلع برة
الولد كرامته توجعه وما يرضاش يدخل الاوضة
ولما كانت مامته تسيبه معانا كان يقول له امشي اطلع من اوضتي وكان برضه بيزعل
وهو كانت دايما كرامته واجعاه الصراحة مش بس عشان اخويا
كان على طول معترض
على طول متضايق من اي موقف بيتعرض له
وكان والدته بتسيبه مع مامتي عشان مشغولة بتحضير الماجستير
كان مسمي مامتي عمتنا لانها اكبر من انها تكون عمته لوحده
ومامتي الوحيدة اللي عرفت ازاي تخليه ما يعترضش
يعني لما كان ييجي من مدرسته علينا اول ما نفتح الباب يقول
طابخين ايه
نقوله بسلة ولحمة
يقول ايه القرف ده ..... مش وااااااااااااكل
ولو اي نوع تاني من الخضار والبروتين برضه ايه القرف ده مش وااااااااكل
مامته في العادي بتتحايل عليه عشان ياكل
لكن مامتي مين ولا عشرة زيه
بصتله بصه حازمة شديدة وقالتله لو ما كلتش دلوقتي مفيش اكل
قالها مش واااااااااااااكل
انتهى الغذاء ومامتي دخلت المطبخ قالت للشغالة خدي كل الاكل وسيبيلي ده وده
وكان عبارة عن طبق ام علي قديم متحجر وبرتقالة
والثلاجة فاضية من غير ولا لقمة
واستنت لما يجوع
هو فضل ساكت وبعدين قال لماما
عمتنا ,,, فيه اكل
قالتله لا يا حبيبي
روح شوف في الثلاجة يمكن تلاقي حاجة
راح المطبخ ورجع معاه طبق ام علي وملعقة
وقعد يحط المعلقة ما تدخلش من كتر ما ام علي ما نشفت
ويكسرها وياخد حتة منها وتسمعها وهي بتقرمش في بقه وياكلها
ويبص لماما ويقول لها
عمتنا
ام علي جميلة
تاني يوم طبعا وهو راجع من المدرسة فتحنا الباب
اول كلمة قالها
تسلم ايدك يا عمتنا