لازم الاطفال تاخد وقتها عيب عليكم بس .....

انا احب ان كل طفل ياخد راحته
المهم ان موضوع انك تدي ابنك راحته وما تكهربوش بالاوامر كادت ان تطيح بدماغي من كتر الغليان
يعني بنتي كانت كل يوم قبل المدرسة لازم تصلي الصبح
تدخل الحمام وتقعد فترة على ما تبتدي تتوضى عادي نداء الطبيعة العادي اللي كلنا بنمر عليه في الصباح
بعد فترة اسمع المية اتفتحت اعرف انها بدأت مراحل الوضوء
المية تنزل على ايدها وهي بتسبغ الوضوء عادي يعني العملية مش استعجال
وتعدد لخمسة في كل ايد وعلى ما الايد التانية توصل للحوض بتاع خمسة كمان وانا واقفة ياللا يا بنتي استعجلي الاوتوبيس زمانه جاي

وساعة ما تبدأ في المضمضة تتخض وتقول
انا عايزة اعمل ....
تقفل الباب ونبدأ العملية من الاول
والمرة التانية وفي غسيل الوجه
نبدأ مرة اخرى في
انا عايزة اعمل ... اكيد النوع التاني من العمايل
ونظل في حالة ترقب مدة الى ان تنتهي عملية الوضوء وندخل على اللبس
وبعديها الافطار
الاوامر
كلي
تقطم قطمة
امضغي
تلوك الاكل مرة ورا مرة ورا مرة
ابلعي
تبلع
كلي
تقطم قطمة
امضغي
وهكذا
اما زوجي الحبيب فهو مستلقي على السرير والاوامر تنهمر
عملتيلهم عصير طازج
اخذوا بيض
اكلوا كويس
عملتي السندويتشات
الاوتوبيس وصل

وعند الانتهاء من هذه المهمة
اكيد لازم تدور على اي دواء تاخده
والنهاية ان القولون العصبي موتني
رحت لدكتور باطني وقلت له مصاريني والمغص والاسهال والامساك وكل ما تتخيله
كشف علي وقال لي انت عصبية ولازم تهدي شوية وبالذات ساعة الاكل
اقولك على سر حيخلي بطنك تتحسن
اسمعي موسيقى كلاسيكية وانتي بتاكلي
كنت حاجيب اوتار جيتار واخنقه بيها هو مش ام والا ايه