لازم تعيطي يعني لازم تعيطي

الظاهر ان انا من كتر ما باحب الناس اللي حوالي كل واحد حاسس اني باحب اللي جنبه
يعني مفيش واحدة من اصحابي كانت بتعتبر اني صاحبتها نمرة واحد لان كل واحدة عايزة تبقىى نمرة واحد
وانا عندي وحايد كتير والصراحة وباتكلم بجد ان انا باحب والحب في قلبي مالوش دعوة بالعدد يعني ممكن احب ميت واحدة وكل واحدة تاخد الحب كله
الحب الحب
الشوق الشوق على راي الفيلم
ولما اتخطبت كنت باتكسف ومن حق اي بنت تتكسف
وعمري ما قلت كلام معسول
عادي من حق كل بنت انها ما تقولش كلام معسول
وعمري ما قعدت اتغزل في خطيبي
عادي هو كل البنات بتقعد تقول كلام حلو ما هي بنت كسوفة على الرغم ان اللي يشوفني وانا جريئة وشاطرة يفتكر اني مش باتكسف بس عادي
مرة عدى علي خطيبي وكان جاي حنزور اخته في عيد ميلادها
لقاني نازلة متشيكة اخر حاجة وقعدت في العربية وقلت له على فين
قالي على اختي
قلتله ابسلوتلي بالعكس
ياللا على سموحة وطبعا وللمفاجأة لكل شباب اليوم سموحة دي كانت كلها ارض ملاحات ومفيش فيها ناس في اغلب المناطق وكان اللي بيروح بالعربية عشان يتعلم السواقة في شوارع فاضية
الراجل عينيه لفت
ليه
قلتله نروح في سموحة في حتة فاضية مفيهاش حد خالص
طبعا كان حيشغل الموتور ولقاني باكمل
عارف ليه يا دكتور
. . . شوية سسبنس 
عشان ناكل التورتة بتاعة اختك لوحدنا ونبقى نقول لها كل سنة وانت طيبة في التليفون
اتكبس طبعا
وفي يوم كان قاعد معايا وانا عمالة اهزر واضحك ولا كلمة حب واحدة لا لا لا
قال لي
على فكرة
انا لو مت عايزك تعيطي
استغربت جدا
قلتله لازم يعني
انا اساسا مش باعرف اعيط بس اوعدك لاني لو ما عملتش كدة الناس تاكل وشي
واكتشف جوزي بعد ثلاثين سنة خدمة اني باحبه بجد وباموت فيه بس طريقتي في التعبير
مش بالعياط