لو عقرب يبقى اس اس اسلامو عليكوا

ذكريات 95

لما رحنا اعارة في سلطنة عمان كانت ايام جميلة ومختلفة عن ايام طفولتي في ليبيا وايام شبابي في مصر
اول حاجة قلت اداعب عواطف جوزي من اول ساعة وصلنا في المطار وللاسف كان تصريح الدخول للبلد لم يصل بعد وكان علينا ننتظر الى ان يأتي مندوب جامعة السلطان قابوس ليحضرها واحنا في المطار قاعدين على الكراسي بصيت لجوزي وعيوني كلها معاني وقلتله
الغربة حتقتلني
جوزي الملتزم مش بتاع هزار وبالاخص مش في المطار
قالي وهو مخضوض
انتي لحقتي ما احنا يمكن نرجع على الطيارة الجاية
قلتله بسرعة كدة ما تسيبناش في نص الطريق
راح سايبني وماشي يسأل على مندوب الجامعة
قعدنا في المطار بتاع 4 ساعات في انتظار المندوب لدرجة اننا دخلنا نمنا في صالون الدرجة الاولى صاحب الكراسي الوثيرة وفتحت عيوني لقيت السلطان قابوس شخصيا واقف قدامي
اتنطرت من على الكرسي وفوجئت انه المندوب لابس اللبس الرسمي اللي فيه خنجر فضة في وسطه
رحنا البيت في الكومباوند بتاع الجامعة وهو كبير ولكن في الصحراء شوية بعيد عن العمران ولكن عمان سمتها ان مفيش زحام كل حاجة بعيدة عن كل حاجة ولو اتولدت في حتة ومفيش عربية غالبا مش حتقدر تسيبها لغاية لما تموت عشان ما تمشيش لاقرب حتة تانية
كان فيه يوم للتسوق وده في مكان بعيييييد نروحله بالعربية
ويوم الفسحة في مكان بعيييييد نروحله بالعربية
وفي يوم من تلك الايام بعد ما عملنا التسوق بتاعنا وجبنا ما لذ وطاب عشان نقعد ناكله لغاية لما ييجي يوم التسوق اللي بعده
سبقني جوزي على البيت ومعاه الاكياس وانا مع بنتي ومعانا آخر كام كيس عشان هو راجل جنتل هو وابني بيشيلوا التقيل ويسبولنا كام كيس
وانا في طريقي الى باب المنزل شفت حاجة سوداء كبيرة وكلمة كبيرة بالنسبة للحشرات يعني قد الكانتالوب او قد الشمامة الصغيرة
البتاعة السوداء الكبيرة لها ديل كبير وعمالة ترميه شوية يمين وشوية شمال
ياماما
ايه ديه
وكانت بيني وبين جوزي
هو على باب البيت وانا في اول الممر بتاع البيت
دفعت ابنتي للخلف في وضع الحماية الطبيعي لاي ام مثالية زيي
وناديت باعلى صوتي على جوزي
باعلى صوتي وعيني على الكائن اللي ماشي واكتشفت انه عقرب
يا  لهوي
عقرب اسود كبير بيرمي ديله اللي بيقرص بيه يمين وشمال من ثقله مش عارف يمشي وهو جنبة
عااااااااااااقراااااااااااااااااااااااااااااااااااااااااااااب
وفي رد فعل تلقائي وبالحركة السريعة جدا التي تصل لحد الحركة البطيئة جدا
دخل جوزي البيت وقفل عليه الباب
نعم
قفل الباب عليه وسابني انا وبنتي مع العقرب برة
مر شريط حياتي كله قدامي
جوزي بيتقدم لي وانا باغلس عليه
جوزي متجوزني وانا باغلس عليه
جوزي بيشقى ويتعب عشان ياكلني ويفسحني وانا باشتغله واعاكسة
خلفت اتنين وانا زي مانا باهزر وهو جد
بس مش لدرجة انه يسيبني مع العقرب انا والبنت
عااااااااااااقرااااااااااااااااااااااااااااااااااااب نفس الكلمة بس المرة دي باستهجان مع غضب ممتزج بوعيد
لقيته فتح الباب حتة صغيرة تكفي انه يطلع حتة من وشه ويتسائل لو سمع صح
عقرااااب ؟؟؟؟؟
قالي تعالي هنا
انا جريت على الباب من خلف الكائن الاسود الكبير ووقفت جنب جوزي وهو في ثانية اخد طوبة كبيرة كنت رصاهم جنب البيت قال يعني ديكور وجواها شوية ورد ويمكن دي من المغريات لكل الحشرات والزواحف
وراح طراااااخ راميها على العقرب
سبحان الله
الطوبة نزلت من فوق على ظهر العقرب اتفتت
والله اتفتت بتاع ميت حتة
لدرجة مدخل الفيلا كله بقت فرافيت سوداء
قفل الباب وهو راض تماما عن نفسه
وبص لي بثقة وانا واقفة في حالة التحفز الاولى في حركات الهجوم السريع للدفاع عن النفس
بتقفل علي انا وبنتك مع العقرب برة وتدخل انت وابنك البيت
افهم بس
كل الحريم في ضربة واحدة
والله عفارم عليك بتعرف تتصرف برضه
وضحكنا طول الليلة بس طلب مني اني احكي الموضوع ده دايما لكل اصحابي عشان يشوفوا انا متجوزة اسد
قال لي بس بلاش قفلة الباب عليكم برة
قلتله لا ده هي الاساس
الاسد كان لازم يعمل كدة يخلص منهم في ضربة واحدة