عيلة بتنور
احنا عائلة غير. تقليدية يعني عمركم سمعتم عن ام اسكندرانية مش بتطبخ سمك ؟؟؟؟ او اب تخصص علمي دخل حقوق لانه مكانش بيستحمل يشوف الجثث في المشرحة فساب الطب وحول حقوق او واحدة دخلت ١١ مدرسة خلال حياتها وشاب يهمه تصوير جاموسة نافقة في طريق مقطوع عن تصوير فتيات هيبيز في البحر او
واحدة نفسها تبقى مهندسة كمبيوتر فتقرر انها تدخل قسم كهرباء لانها ستضطر لدراسة كمبيوتر فوق دراستها ويبقى ما انساقتش لرغباتها
العائلة المحترمة اللي تعشق البعد عن العادي هي وبلا فخر عائلتي
ولما اتخطبت دخلت الى عالم العائلات التقليدية
عائلة عاشت في منزل واحد طوال حياتها ،آه والله واحد
أنا مش ناسية لما كنت ساعات اصحى من النوم اقعد حوالي خمس دقائق لمعرفة إحداثيات حياتي وأبص للدولاب
دي أوضتي اللى في إسكندرية يبقى أنا في إسكندرية طيب اقوم أشوف مين معايا في البيت عشان ابتدئ اليوم
أنا كنت كل يوم بالليل ازور مامتي وبابايا في اوضتهم وأقول لهم أرجوكم بلاش القرارات بتاعة مسافرين دلوقتي دي على الاقل ادوني فرصة احضر شنطتي بس على مين
نرجع لخطيبي اللي من اسرة تقليدية عاش في بيت واحد وراح مدرسة واحدة وكان عندهم نفس الجيران وبيروحوا نفس النادي في نفس البلد
ايه الملل ده
ما علينا هو كان لازم استقر برضه
بعد ما اتخطبنا وكان يوم جمعة وقال لي ايه رأيك نتغدى مع أهلي أكلة سمك حلوة
قلت وماله ده أنا ما كلتش السمك من السنة اللي فاتت
تاني جمعة قال لي
ايه رأيك ناكل أكلة سمك مع أهلي
قلت وماله أنا برضه محتاجة شوية فوسفور عشان بادرس الماجستير
ثالث اسبوع قال لي ايه رأيك نخرج لابو قير ناكل سمك مع قرايبي اللي جايين من مصر
قلت وماله قرايبه بقى وصلة رحم وكلام من ده
الاسبوع اللي بعده قال لي ايه رأيك في أكلة سمك ف......
ما كملش الكلام
قلتله
أكيد النور عندكم بيقطع بالليل
سألني ببراءة ليه
قلتله لأنك عندك عيلة بتنور بالليل من كتر الفوسفور اللي عمالين تاكلوه
اهم ما في الموضوع أني من ساعة ما اتجوزت وانا بقيت بأحب السمك لكن لسة زي ما انا غيرت كذا شقة واولادي دخلوا كذا مدرسة يعني بصمتي موجودة في DNA بتاع العيلة الجديدة
الله يرحمك يا بابايا
تعليقات
إرسال تعليق