ماما حبيبتي لازم تشرب لبن ومراتي تطلع من الحلم

جوزي الحبيب من النوع الحنين جدا واللي بيحب اهله وعلى طول قلق عليهم وكان بيقلق على والده ووالدته وكل ما نبقى في البيت مرتاحين او بنتفرج على التليفزيون او بنتفسح او في رحلة كان على طول يتكلم ويقول لي انا قلقان جدا وانا اطمئنه والله دول بخير وكويسين والحمد لله واحنا فين والناس التانية فين ولكن على مين
تمر السنوات ويتوفى حمايا بعد رحلة عذاب قصيرة ولكنها مؤلمة بعد ان تسمم الدم وكانت رحلة مع العمليات وغيرها
واصبح زوجي مرتبط بوالدته جدا ويحب دايما يطمئن عليها
ووقتها كانت لا تشكو من شيء ولله الحمد لا ضغط ولا سكر ولا قلب وعمرها يصل للسبعين وكل ما اقوله الحمد لله طنط قلبها كويس ومعندهاش امراض مزمنة يبص لي ويقول لي
قري على مامتي أو انتي مش حاسة قد ايه هي لوحدها على الرغم من اني كنت باخليه يزورها يوميا بين المغرب والعشا
وفي يوم بالليل وانا نفسي انام بدون ما افكر في سلبيات وحاجات تقلق لان دي عادتي ومش حاشتريها لقيت جوزي قلق كالعادة قلت كل مرة اقعد اقوله هي كويسة والموضوع بقى مش بيؤثر عليه فقررت اقلق زيه واجاريه في قلقه عشان ابقى زوجة طيبة واول ما قال مامتي قلتله فعلا انا قلقانة على طنط تصور انا ملاحظه انها مش بتاكل كويس لدرجة انها خست جدا وظهرها انحنى
عارف ده ممكن يكون نقص كالسيوم والا حاجة وبخ كان نام مني اتاريه مش نايم ده ساكت وبيفكر في اللي انا قلته
على الساعة اتنين مساءا قام من السرير وفتح الشباك ووقف ياخد نفسه لانه قلق على مامته ومش عارف ينام وراح على التليفون وكلم مامته وقال لها ممكن تروحي تاخدي كوباية لبن
الست طبعا مش فاهمه ان موضوع الكالسيوم لي يد فيه
قالتله ايه اللي خلاك سهران تفكر في اللبن
وما بقاش عارف ينام
قلت اعملي باصلك ومادام انتي السبب في كل القلق ده احكيله حكاية تنيمه
صلي على النبي
عليه الصلاة والسلام
وزي اي حلم بابتديه بانه في البحر في يوم حر ولكن الجو جميل والهواء عليل بيطل على وجهه الوردي من اشعة الشمس الدافئة وان المياه تنساب على اصابع قدمه تدغدغه ولا تضحكه وهي دافئة دفء دموع العين واكمل
وفيه مزيكا في الخلفية اتاري فيه ستات جميلة لابسة ريش وبترقص على اوتار جيتار ولابسين ورود حلوة على شعرها
اكيد لو كان عنده ايه كان هدأ وانبسط وكل ما اسكت يقول لي كملي
ارتخى امامي وانا اكمل
وجاءت سيدة من الخلف لم تر وجهها ومعها زيوت طبيعية طبية ترخي الاعصاب المتوترة وبدأت في دهان جسمه بالزيت ويدها دافئة بضه
واكيد رخرخ مني خالص وراح وراء السحاب
وابتدت الاعراض السادية تظهر واكملت
وانت نايم سمعت صوت واحدة بتقولك بصوت عالي
انت بتعمل ايه
ولقيتها انا مراتك
توقعت انه يفتح عيونه ويتخض والا حاجة ولكن لدهشتي
فضل مغمض عيونه ومرتخي وقال بصوت تقريبا من طالع من كتر الحنية
اخرجي من الحلم
ضحكت ضحك السنين وقلت له
ده الحلم بتاعي اخرج وقت ما احب
انت بتعمل ايه سايب واحدة تدهنك وانا موجودة
ومش حاقولكم الحلم التاني لما قعدت اقوله انه مسافر لبنان وواحدة جميلة رشيقة هيفاء ذات رائحة تذهب العقول وقعدت جنبه وهو بص لها وقال لها اسمك ايه
قالتله
كوكا هانم
وتوقعت يقول لي اخرجي من الحلم ولكن لدهشتي قال لي
برضه
قلتله ايه برضه هي كوكا هانم
قال لي زي اسمك
قلتله يا عم هي انا وان كان عاجبك
وبطلت احكي حكايات من النوع ده لان انا اللي بيتحرق دمي
وبقيت اسمع القلق بتاع كل يوم وانام انا احلم ان عايزة اطلع في الاسانسير ومش مقضي عشان هو يباخد عشرين كيلو بس
يالا احسن ما اسيبه مع واحدة لعبية
تصبحوا على خير بقى