اول مرة اوووويييل ماااارة

اول مرة تحب يا قلبي واول يوم اتهنى
اغنية عبد الحليم كنت اسمعها وانا صغيرة وكنت اعتبره مبالغ
ايه اول مرة تتهنى
اكيد يوم ما طلعت رحلة مع المدرسة انبسطت
اكيد لما اكلت اكله حلوة مع اهلك اتهنيت
والا لما مامتك تبوسك بالليل وتغطيك

نرجع لابني حبيبي اللي كان مش من عشاق الاكل
يعني الاكل بالنسبة له واجب غير مرغوب فيه
مرة سألني
هي الجنة فيها اكل برضه
قلتله
اكيد ده انا ازعل قوي
قالي وهو زعلان
حتى الجنة ياربي
طبعا لما كبر شوية وهو في سن المراهقة كان الوضع مختلف تماما
ابني كان لازم كل يوم يعرف حياكل ايه ويحبه والا لأ
اقوله تحب فراخ والا لحمة
يقول لي لحمة
وقبل ما يخرج من الاوضة
لا لا فراخ
وبعدين يرجع يبص لي من قريب
لحمة احسن
ويديني ظهره وهو بيقول فراخ فراخ
وفي الآخر اعمل الاتنين خوفا من انه ساعة الاكل يقول لي انا قلت لحمة وانا عاملة فراخ
يعني كنت يوميا لارضاء الجميع علي واجب قومي وطني امومي مرهق
جوزي بيحب الخضار المطبوخ بالبروتين مع الارز
بنتي بتحب المكرونة اسباجتي والبطاطس بكل شكل الا صينية البطاطس في الفرن
ابني زي ما قلتلك
وفي يوم كان ابني راجع من المدرسة والظاهر ما اكلش الساندويتش بتاعه ويوم ساقعة يعني اليوم المثالي لاي ام لانه الموجود حيتاكل والكل حينبسط لانه جعان
دخل ابني البيت وبسرعة كان على السفرة وحط في طبقه من كل صنف واكل واكل
وفي الآخر قام من السفرة وقالي
اول مرة اشبع
الحمد لله
نااااعم ، ده انا اللي باقول
اووويل مرة اوييييييل مررررررة
ليه انت عمرك ما شبعت قبل كدة
جري على اوضته عشان ما تحصلش مناقشات
تاني يوم على السفرة كنت مركزة عليه
اكل ولما قام سألته بتحفز
شبعت يابني
قالي الحمد لله
رديت
يعني يعتبر تاني يوم تشبع فيه من يوم ما اتولدت
ايوة
ومش حاقولكم كام يوم اكدت على معلومة انه بيقوم شبعان من على السفرة
المهم الظاهر ان الموضوع ده تسبب له في حاجة جوة مش تمام لان مرة سمعته بيقول لباباه
هو انا لازم اكل كل يوم
قال له ايوة عشان وشك يبقى احمر زي مامتك خدودها على طول حمراء
رد
طيب ما تطلقها وتتجوز واحدة ما عندهاش خدود حمراء
دخلت انا في الوقت المناسب وقلت له ايوة
ما تتجوز واحدة خدودها مش حمراء ولما ابنك ما ياكلش واكمنها مش مامته بدل ما تقول له كل حتضربه بالشبشب عشان ياكل غصب عنه
بص لي وبص للشبشب ابو كعب وقال لباباه
انا باقول خليك متجوز مامتي اهو اللي نعرفه احسن من اللي ما نعرفوش
وده كان آخر يوم اسأله اذا كان شبعان والا جعان
خليني على ذمة الراجل ولو قام جعان مش مشكلة