جوزي دايما يرمي ودن وانا عمري ما اكذب

الجواز مسئولية
بيت اولاد طبيخ زبالة تترمي وبالذات الزبالة اللي تترمي دي من اهم المسئوليات وزمان كان الزبال ييجي لغاية الباب وياخدها
انا دايما اقعد في البيت براحتي وبالتالي لما ييجي الزبال لازم ابحث عن طريقة مناسبة عشان اقدر افتح الباب واديله الزبالة وعشان ما اتحيرش قررت اني اطلع الزبالة قبل ما ييجي
ولان بيتنا طراوة والهواء جميل والباب في طريق الهواء فلازم اطلع الزبالة بسرعة في سلم الطوارئ (الخدامين سابقا) وارجع بسرعة على البيت يكون الهواء قفل الباب
ييجي جوزي من الشغل يلاقيني عند جارتي ولابسة حاجة من عندها للستر ومستنياه عشان ناكل عيش وجبنة لان ما طبختش
في يوم من الايام صحي جوزي من النوم
اقصد قائد القوات المنزلية
سيادة اللواء رائد قائد القوات وقف وبصوت جهوري
ما تفتحيش الباب ابدا وانت مش جاهزة
ما تفتحيش الباب ابدا وانت مش جاهزة
ما تفتحيش الباب ابدا وانت مش جاهزة
متهيألي سمعتيني المرة دي
مش عايز اجي اجيبك من عند جارتك فاهماني
مش حيحصل طيب
وانا مثل الكتكوت المسلوخ واقفة وكلي جسارة
ماشي مانا عارفة دي بتبقى غلطة
يعيد جوزي الكلام
ما تفتحيش الباب ابدا وانت مش جاهزة
ما تفتحيش الباب ابدا وانت مش جاهزة
ما تفتحيش الباب ابدا وانت مش جاهزة
متهيألي سمعتيني المرة دي
مش عايز اجي اجيبك من عند جارتك فاهماني
 وارد بصوت مرتعش شجاع
خلاص فهمت انتهى مش حنعيدها كتير
يرد مقدم عقيد قائد القوات
ما تفتحيش الباب ابدا وانت مش جاهزة
ما تفتحيش الباب ابدا وانت مش جاهزة
ما تفتحيش الباب ابدا وانت مش جاهزة
متهيألي سمعتيني المرة دي
مش عايز اجي اجيبك من عند جارتك فاهماني
 المهم ينزل زوجي الجميل للشغل وانا قلت ابتدي اعمل بامية جميلة باستخدام حلة الضغط وللي ما يعرفش الاكل بيستوي في 10 دقائق لو من غير لحمة وعشرين دقيقة لو بلحمة وانا كنت عاملاها من غير لحمة لان اللحمة لوحديها وافتكرت في نص العشر دقائق اني لازم اطلع الزبالة فقررت احطها جنب الباب والزبال يشوفها وفتحت الباب وطلعت راسي يمين شمال مفيش حد في الدور كله
رحت بسرعة واخدة الزبالة عشان احطها جنب الباب وطرااااخ
يتقفل الباب علي
يانهار اثوث يانهار ازرق يانهار مش فايت
اخبط على جارتي
فتحت جارتي ولاقياني بلبس البيت الجميل
قعدت تضحك وانا مكشرة
تقولي تعالي استني معايا وساعديني مع الاولاد
قلتلها ابدا انا جوزي النهاردة قالي حاجات كتير جميلة واخرها انه مش عايزني افتح الباب لحد
وحييجي يلاقيني عندك حيزعل
المهم اجتمعت الجارات وقررت واحدة منهم اننا نجيب عيل من بتوع البناء ونعمل له معبر بين البيتين ويدخل يفتح الباب
والجارة التانية قالت نجيب واحد يكسر الباب
والجارة الثالثة قالت خليها تساعدني في الطبيخ
وافتكرت
البامية على النار
يعني ممكن البيت يولع
ورجحت ان حد ييجي يكسر الباب لان مفيهاش تضحية باحد الاولاد الطاهرين
جابتلي كتر خيرها واحد احول ابن لذينه تقريبا ما سابش حتة في الباب من غير ما يسيب فيها علامة عشان مش عارف فين اللسان
وكل ما يدق والباب يتعلم عليه اقول ادي زعيقة وكمان خبطة يبقى كمان زعيقة
فتح الباب واخد اللي فيه النصيب ودخلت كملت وقلت اول ما جوزي حيشوف الباب وهو متخبط بالطريقة الهمجية دي حيعرف على طول
بس هي موته والا اكتر
جاء موعد عودة الاسد المغوار وفتح الباب بالمفتاح وناداني برقة
وانا مستنية الهدوء الذي يسبق العاصفة
قالي انا شامم ريحة اكل جميل
انا عشت الدور كاني ما عملتش حاجة
طبعا يا جميل انا عملتلك بامية زي العسل مع لحمة بفتيك والا الرز بالزبدة والمستكة يجنن
اكلنا وعدى الموضوع على خير ولكن
جالنا زيارة اخته وزوجها
وجلسنا جلسة عائلية جميلة وسالتني اخت جوزي
ايه اللي مبهدل الباب
قلتلها وبكل امانة لاني مش باعرف اكذب اساسا
اسكتي مش الباب اتقفل علي وانا برة النهاردة واحتست اصل اخوكي كان الصبح قالي على الله تعملي العملة دي تاني
وواحدة جارتي قالتلي نجيب واحد يفتحه قبل جوزك  ما ييجي والراجل طلع حمار وقعد يكسر في الباب
ونظرت بجواري
لقيت ملازم اول عقيد عميد لواء مشير قائد القوات المنزلية بيسمع مع اخته القصة
فترة صمت
نظرات كلها معاني
قلتله : اوبس انت عرفت
.
.
.
على فكرة انتم عارفين هو عمل ايه
قرر ان انا مش باسمع الكلام وكبر دماغه بعد كدة بس عمره ما جاب لي قمصان نوم الا بكم وطويلة يعني عايشة في بيتنا محجبة طول الوقت