تسمحي لي أقولك انك وقحة

كنت بنت مؤدبة والموضوع مش اكتر من أني باخاف من الأولاد والله يعمر بيته اخويا الكبير قال لي وانا داخلة الكلية
بصي يا بنت الحلال مفيش حاجة اسمها الواد راجل وكلام السينما ، الراجل بيبقى راجل لما بيعاكس البنات ومفيش حاجة اسمها الواد معجب بيها ده اسمه بيحور عليها والبنت الطيبة هبلة والبنت قليلة الذوق مؤدبة واذا ابتسمت في وش زميلك يبقى ييجي منك ولو ما عبرتيهوش يحترمك والولد من دول بيتجوز المؤدبة وبيصاحب الهبلة
كلام منتقي خلاني قليلة الذوق مع كل الصبيان وخلاني في الكلية لوحدي ماليش زملاء اقول كانوا دفعتي دول ابسلوتلي
فضلت على المبدأ واخويا سعيد بي لما واحد صاحبه قاله أختك دي عاملة زي الوردة اللي ماليانة شوك
من ضمن طرق أبعاد الشباب من سكتي أني اعمل نفسي مش شايفه وللأسف الموضوع ده نرفز ولد كان عايز ينضم للمجموعة بتاعتي وانا زي ما اخويا قالي لازم أبقى قليلة الذوق عشان يقول علي مؤدبة وانتهى انه افتكر أني باتعالى عليه وقرر انه يردلي الإهانة وانا ولا على. بالي
في يوم جوه المحاضرة وقال ايه يقعد في البنش اللي قدامي وفي آخر المحاضرة يقوم يقف ويلتفت ويبص لي وبكل ثبات وصوت عالي يقول لي
تسمحي لي أقولك انك وقحة
وراح خارج من البنش وطالع
أنا طبعا وعشان خيالي واسع تخيلت ان الطلبة اللي في المحاضرة زمانهم بيقولوا أني مثلا كنت بالعب في قفاه او بأشد شعره وانا منذهلة جري وراه واحد من دفعتي وانا قلت راح يمسكه من قفاه ويضربة قلم ووصل له وقال له هي رجولة انك تشتم وتجري
نعم يا بابا آمال يشتم ويستنى يا عم اضربه بالقلم والولد ساق فيها وهات يا زعيق وانا حاوريها ام شعر اصفر دي والصراحة أنا عمر ما كان شعري اصفر بس كان فاتح حبتين ولكن مش دي القضية ، القضية أني اتشتمت قدام الدفعة كلها وكرامتي اتبعزقت ولازم حل للموضوع
رحت واخدة بعضي ورحت على اخويا وكان معايا في نفس الكلية وكان واد عاقل مش متهور وانا عارفة انه كان حيتكلم معاه مان تو مان ويقول له كلام من الفلسفة المختلفة لان دي طريقته دائماً في حل المشاكل
المهم ان اخويا كان مربيله كام عضلة كدة لزوم جذب الفتيات ولابس جاكيت جلد مبطن مزودة حجمه حبتين وجاي من بعيد ومسك واحد من الدفعة وسأله هو الواد اللي شتم فين
طبعا الخبر انتشر ان أنا جبت اخويا يضربه مع أني متأكدة انه عمره ما كان راح يضربه زي ما أنا متأكدة من ان حركة يناير ٢٥ هي ثورة بحق وحقيق
الواد شاف اخويا وجري ومعرفش يتكلم معاه
قلت اروح اشتكي لرئيس القسم
رحت لرئيس القسم ولقيت كمية من الأساتذة المحترمين في الاوضة ودخلت وقلتله
يا دكتور في ولد شتمني في المدرج ولسة ما كملتش الكلمة لقيته قالي هو انتي اللي جابية أخوكي يموته
قلتله يموته بتاع ايه أكيد ما كنش رايح يقتله
راح دكتور تاني قال لي شوية كلام انجليزي كتير كتير كتير فهمت منه أني لازم اعمل نفسي أني ما اتشمتش
بعد الحادثة دي اللي ما قدرتش ارد كرامتي من الولد وهو اساسا خوفا من اخويا ما جاش الكلية تاني
قررت بعديها ان البنت مش لازم تبقى قليلة الذوق عشان الأولاد تحترمها وتتجوزها لانها في الآخر بتتشتم
والبنات في الآخر مش بتتجوز من الكلية من اصله هي بتتجوز من بيت اهلها