عدد النسمات في نيجيريا = كيسين شيبسي وكوكاكولا

-
اخطر مادة كانت بتتعب اولادي هي المواد الاجتماعية وبالذات الجغرافيا
كلها عدد ونوع وكم وكلام فاضي ممكن كله يتلاقي في اي كتاب
مش عارفة المواد دي طريقة تدريسها هي عبارة عن انك تحفظ وتحفظ وتحفظ
وانا كانت طريقتي في الحفظ مع بنتي بالذات لانها مش متبرمجة تحفظ هي تفكر بس
طريقتي ان اقعد احكيلها حكاية واحد رايح الكونغو فلازم يشرب كاكاو وهو لابس دهب والماظ كتير عشان دي الحاجات اللي الكونغو بتنتجهها مثلا
والفرنساوي يوصل عربيته البيجو في الطيارة البوينج وهو بيسكر شمبانيا
وكان فيه طريقة عشان الارقام تتحفظ اني اقول لو 75 مليون نسمة يبقوا جنيه الا ربع
والجنية الا ربع ده يجيبلك ايه ونقعد نحسب انا وهي الحاجات اللي ممكن اجيبها بعدد نسمات نيجيريا
وساعات كنت اقولها دوري على طريقة مبتكرة تذاكري بيها
وفي يوم كنت معدية في المرور اليومي على حجرات الاولاد (على فكرة انا عمري ما عملت مرور تلاقيني كنت رايحة افتح الباب للمكوجي وعديت بالصدفة )
لقيت بنتي عمالة تقول كلام غريب وتشاور فوق وتشاور تحت والكلام كله ياباني على صيني على حاجات مش فاهماها قلتلها ايه اللي انتي بتعمليه
قالتلي دول انهار آسيا يا مامي
تقول اسم النهر وتشاور لفوق لانه بيصب في الاعالي والتاني تشاور تحت عشان بيصب تحت وواحد منهم يمين وواحد شمال
فرحت جدا انها عرفت الطريقة المبتكرة دي لحفظ الانهار
هي طلعت اجدع مني انا حاولت مرة احفظ النصوص عن طريق اول الابيات
وساعة ما وقفت اسمع الشعر ما عرفتش الترتيب والموضوع كان بايخ
اما ابني فكان مشكلته في العربي
وانا عرفته الفرق بين كان بطلة الاثقال واخواتها وان الحرامية واخواتها
كان دايما ترفع اللي وراها في الجملة وان تنصب اللي وراها في الجملة
مش حاقولكم المدرسة عملت ايه لما تباهى قدامها بالقصص بتاعتي عملت ايه
اخذته على جنب وقالتله
دور على مدرس يديك درس خصوصي
المهم ان طريقتي مكانتش وحشة اهو الاولاد اتخرجوا من الكليات ماشاء الله
صحيح العربي تعبان والمواد الاجتماعية مش قد كدة لانهم الاتنين دخلوا هندسة
انما اهو اتخرجوا اما شوف ولادكم ياللي بتضحكوا دلوقتي حيعملوا ايه

تعليقات

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الاولويات تقلل من الحوادث بس للي مش معقد من حياته

-
  مشكلة المرور الاكبر هو احترام الاولويات يعني لما تكون في اشارة حمراء يبقى الاولوية للي اشارته خضراء لكن لو مفيش اشارات لازم انت نفسك تكون عارف مين يعدي الاول مش علشان هو احسن منك ولا علشان هو ابن باشا او ظابط ولا علشان انت عينيك مش خضراء وشعرك ناعم ولا علشان شبه محمد صلاح الالولويات بيحددها قانون المرور اللي احنا ناس كتير بتعتبره زيادة الفبريكة وسبوبة للي شغالين في المرور تعالوا نناقش الاولويات 1- الطريق الرئيسي بيكون له اولوية على الطرق الجانبية وبالتالي اللي طالع من الطرق الجانبية لازم يبص كويس قوي قوي امتى يدخل في الشارع الرئيسي (طبعا احنا بنعتبر اننا دايما في طريق رئيسي وان اي ح..ر ما يقفش يبقى لا مؤاخذة برضه ح..ر ) 2- لو احنا في طريقين فرعيين يعني انت شارع صغير في تقاطع والشارع اللي بيقطع اتجاهين يبقى الاولوية اللى على يمينك مش علشان هو ابن ناس وانت وحش ولا علشان هو خاله لواء 3- لو احنا في طريقين فرعيين و لو الطريق المتقاطع معاك اتجاهه شمال يعني بيقطع من على شمالك يبقى انت لك الاولوية مش علشان هو وزنه خفيف ولا علشان عاطل عن الشغل ولا علشان مش من كليات القمة و لكن علشان انت على ي
قراءة المزيد