الحق والباطل

أَنزَلَ مِنَ السَّمَاء مَاء فَسَالَتْ أَوْدِيَةٌ بِقَدَرِهَا فَاحْتَمَلَ السَّيْلُ زَبَدًا رَّابِيًا وَمِمَّا يُوقِدُونَ عَلَيْهِ فِي النَّارِ ابْتِغَاء حِلْيَةٍ أَوْ مَتَاعٍ زَبَدٌ مِّثْلُهُ كَذَلِكَ يَضْرِبُ اللَّهُ الْحَقَّ وَالْبَاطِلَ فَأَمَّا الزَّبَدُ فَيَذْهَبُ جُفَاء وَأَمَّا مَا يَنفَعُ النَّاسَ فَيَمْكُثُ فِي الأَرْضِ كَذَلِكَ يَضْرِبُ اللَّهُ الأَمْثَالَ
.
هنا بقى الاية في الزبد اللي على الوش
يعني شوية الرغاوي اللي بتاخد القذارة وتبعدها عن الاصل
يعني لما بيعملوا الذهب بيغلوه يطلع على وشه الخبث اللي هو شوية الرواسب اللي مالهاش لازمة
ربنا بيورينا انه بينزل المياه وتروح في الاودية وبرضه بقدرها يعني القدر اللي ربنا عايزه
لما تشوفوا كمية المطر اللي بتنزل على الارض واللي بتتجمع واللي بترجع المحيطات والبحار تلاقي ميزان كبير بيخلي كل حاجة نازلة بحساب ولا البحار خلصت ولا الناس غرقت كله بقدر المهم ان ربنا لما بينزل المياه على الارض بيبقى على وشها الزبد زي الزبد اللي بيبقى على وش الذهب لما تصيغه او الحديد في المصانع
هنا بقى ربنا بيقول لنا الحق والباطل
ان الحق بيفضل زي ما المياه بتروح في الارض وتروي لكن الزبد مش بيستمر بيذهب جفاء يعني في الصياغة بيترمي
سبحان الله
الباطل خفيف وعلى الوش وبيروح والحق بيستمر وبيروح في الارض يروي ويستمر في الارض
الاية دي بتطمني ودايما لما حد يقول لي الدنيا بقت وحشة اقول لهم بالعكس الدنيا احسن الف مرة
الوحش هو اللي بيبان علشان صوته عالي وريحته تزكم
الدنيا حلوة لان المياه اضعاف الزبد والمياه بتروي والزبد بيقعد على حرف المياه وبيبقى ملح محدش بيستخدمه
ربنا بيضرب لنا مثل علشان نطمن ان الحق باق وبيزيد والباطل بيطير