عايز تتغير يبقى لازم تغيّر الاول

لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ إِنَّ اللَّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنفُسِهِمْ وَإِذَا أَرَادَ اللَّهُ بِقَوْمٍ سُوءًا فَلاَ مَرَدَّ لَهُ وَمَا لَهُم مِّن دُونِهِ مِن وَالٍ

.

.

المعقبات اللي هي الملايكة اللي بتتعاقب علينا كل واحد بنوباتشيته ما بين النهار والليل وما بين بيحافظوا علينا وكلمة من امر الله الشيخ شعرواي بيقول بسبب امر الله مش بيحفظوه من اللي ربنا امر بيه علشان دي ممكن تعمل لخبطة للي مش عارف لغة عربية كويس

حتة ان الله لا يغير ما بقوم حتى يغيروا ما بانفسهم دي بقى جامدة بشكل غير عادي

دي من اقوى الايات واكثرها استخداما في حياتنا وبيكملها سورة العصر

اولا ربنا سبحانه وتعالى قال بقوم مش بفرد او بمؤمن يعني التغيير للقوم

يعني مصر مش حتتغير الا لما المصريين يقرروا يغيروها

طيب تتغير من ايه

اكيد ان القوم او الناس او المجتمع او المصريين بيعملوا حاجات بتتسبب ان الوضع مش كويس يعني مثلا سمعتنا برة اننا بنشتغل بالفهلوة واننا متسيبين او ايا كانت السمعة فهي بسبب عمل ولكن ليس فردي

عمل منتشر

عمل يقوم به قوم مش واحد

العمل ده احنا سايبينه مش بنغيره

انا شايف ان السلوك الجماعي وحش وسايبه

تيجي صورة العصر وتقول

.

.

وَالْعَصْرِ -1

إِنَّ الإِنسَانَ لَفِي خُسْرٍ-2

إِلاَّ الَّذِينَ آمَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ-3

.

يعني لو مش حنتواصى مع بعض ونوصي بعض بالحق والصبر يبقى خسرانين وربنا مش حيغير حاجة فينا لاننا مش عايزين نغير نفسنا

اوباااااا

ده كدة الموضوع لبس فيك انت وفيكي انتي وفي كل المصريين

عايزين مصر تتغير

روح حاول تغير الناس وتوصيهم بالحق والصبر

من غير كدة

حنفضل زي ما حنا

والاوحش بقى

ربنا يستر يعني

ان ربنا يلاقينا مفيش فايدة يقوم يريد بنا السوء وساعتها لا مخرج من الموضوع الا الله

النصيحة

حاولوا تغيروا

لو حد عمل معاك حاجة انت حاسس انها مش صح قول له بطريقة بسيطة فيها ابتسامة

يا عم كدة غلط ممكن تاخد اللي انت عايزة بطريقة احسن

والتواصي ده في النهاية حيسمّع ، على الاقل نبقى بنحاول نغير ما بانفسنا علشان ربنا يساعدنا نتغير