اجمل الايام

النهاردة من اجمل الايام اللي ممكن تعدي على اي انسان
اولا النهاردة وصلني ان فيه قرية كاملة باذن الله حتخلص كل الاعمال في بيوتها بحيث يعيشوا عيشة ادمية وكمان ان شاء الله فيه 15 اسرة حيجيلها ماعز وفراخ ومشاريع
وده قبل الشتاء يعني الشتاء الجاي حيكون جميل على اهل قرية الاندلس ومحدش فيهم حيبات سقعان وانا متاكدة ان قريب كمان باقي الاسر كلها حيجيلها الماعز والفراخ والمشاريع وبكدة القرية تعيش كلها عيشة ادمية وحياة كريمة ويكون عندها امن غذائي
ثانيا النهاردة وصلني ان فيه تبرعات حتروح لمساعدة ولد من جواهر الطريق علشان يحضر دورة ياخد بيها شهادة عالمية علشان يمارس العلاج المساعد باستخدام تقنيات الريذمك موفمنت وقد تكمل المساعدات بالكامل وبالتالي الولد ده ان شاء الله يتحسن مستقبلة كله
ثالثا النهاردة وصلني ان واحد من الشباب اللي شايل هم عيلته لدرجة ان جاله مرض مناعي بياكل في مصارينه وبيتسبب في الام رهيبة في جسمة كله وصلني ان الشاب ده باستخدام تدريبات ماسجوتوفا وانيت بانيال لاول مرة يشعر بتحسن ويشعر انه ممكن يبدأ حياته الطبيعية
رابعا وصلني النهاردة ان فيه ناس حتساعد بمبلغ شهري في علاج طفل وبالتالي البنت اللي عندها ثقبين في القلب حيجيلها علاجها والحمد لله
خامسا وصلني النهاردة من بعض الاحباء دعم حلو زيهم وباذن الله حيروح في مكانه
مش باقولكم يوم حلو
يايلا افرحوا بقى احنا عايزين ايه غير انكم تشعروا ان فيه امل
مصر حلوة باهلها وحتفضل حلوة على طول ما دام فيها ناس زيكم