6 اكتوبر تاريخ لا ينسى
صباح جمعوي جميل ان شاء الله
الجو بدأ يجيب نسمة حلوة
سنة 73 زي النهاردة كان يوم كله انفعالات وخوف وفرح
خوف على اولادنا اللي في الجبهة
وفرح انهم في 6 ساعات كانوا في سيناء
اسرائيل كانت مصدرة للعالم كله ان خط بارليف المانع الصاد اللي هي حاطاه على طرف القناة قدامنا منيع فزيع مريع محدش في العالم يقدر يعديه وانه لو اتضرب بقنبلة نووية حيصمد وشوية حيشتكانات صهيونية عجيبة
اتكسر بالمياه
هاهاها
جاتهم خيبة على خيبتهم
المصري الذكي طلع برة الصندوق يا صهيونييين
اليوم ده كان يوم كل الانفعالات طلعت على الوش
انا كنت مخلصة ثانوية عامة واتقبلت في هندسة اسكندرية ومستنية دخول الكلية وحصل العبور وفضلت الرصاصة في جيبي على راي محمود يس
كنت لسة جاية من طرابلس بعد غيبة
ما عنديش اصحاب فاكريني وفاكراهم لان اتغيرت الدنيا وزمان كان التليفونات الارضي مش عند كل الناس وبالتالي ما عنديش تليفونات كتير اعرف حتى اتواصل معاهم
الفترة دي كانت حياتي كلها مرتبطة باخويا الكبير اللي بيني وبينه اقل من سنة او توأم روحي
كنت ما بين التليفزيون والراديو اسمع التفاصيل واشوف الدبابات داخلة سيناء واسمع عن صائد الدبابات واعيش اجمل الاوقات
طلعت توتري في عزف البيانو لدرجة اني ارتفعت في قدرتي على العزف من شوية سوناتات ضعيفة الى سوناتات بيتهوفن
ارتفعت قدرتي في الرسم من شخبطة الى بورتريهات
استمتعت بايام جميلة ودخلت الكلية وانا في كامل شعوري بالعزة
كل 6 اكتوبر واحنا كلنا في نصر وعزة
تعليقات
إرسال تعليق