والله لا تقلق

والله لا تقلق فلله مقاليد كل شيء
ساعة ما لقينا حريق شديد جدا في المستشفى اللي تحت وسامعة ناس بتصوت ورحت لقيت الحريق من عزمه صوته واصل لعندي في الدور السادس
تخيلت في لحظة ان النار حتمسك في كل الستاير والشبابيك الخشب
رحت مكلمة بوليس النجدة وقعد يديني نمرة من سبع ارقام اكلمها علشان المطافي تيجي وكلام فاضي من ده ووصلت للمطافي وبلغت
رحت على الاولاد قلتلهم انزلوا وانتم في السكة اضربوا جرس على كل باب وقولولهم حريقة في المستشفى علشان ينزلوا ما تسيبوش حد
كلمت اللي اعرفهم في الادوار اللي اعلى مني
ورحت على الدرج اللي فيه الصيغة والفلوس والاوراق اللي قدرت احطهم في شنطة حطيتهم وده كان قبل ما يتسرق الدهب بتاعي يعني الحرامي حيوفر علي خطوة
نزلت ومعايا الشنطة لقيت الشارع بتاعنا ماليان عربيات
بنتي قالتلي لازم نوسع لعربية المطافي
جت العربية وطلع من الصعب الوصول لورا
والاهم مفيهاش مية وبتدور على مياة عندنا
المهم وصلناها بمياهة الحريقة اللي رئيس مجلس الادارة ولله الحمد عملها من نفسه حماية للعمارة
قعدنا مدة بيطفوا النار
طلعت بعد ساعة والا ساعة ونصف ولقيت الرجالة واقفة على المكان
كل ما تحرك حتة او تنكش النار هوب تولع تاني يطفوها
قعدنا اكتر من اربع ساعات علشان يطفوا النار اللي تحت
الخلاصة من القصة
الذعر ما يعملش حاجة
الذعر يخلي الناس تخبط في بعض
حاول تقول لنفسك ان السرعة والتخبيط حيوقفك اكتر ما يشغلك
طبعا بعديها يومين قعدت في السرير لان التماسك بيخلي الجسم يتخفز اكتر وبالتالي بيشتغل جوه اكتر من برة
لكن عدت
الكلام ده من اكتر من خمستاشر سنة
باقوله دلوقتي علشان شايفة فيه ناس كتيرة خايفة
وبتتصرف بذعر
انا مش باقول اني بطلة
انا باقول اني ثقتي بالله بتعطيني هدوء
يارب يارب كله يعمل كدة
اول حاجة فكر تعمل ايه
ما تقعد تفكر انت فين وان اللي بيحصل ده مصيبة
فكر تقدر تعمل ايه في المصيبة
حتلاقي الدنيا بتمشي معاك والحال بيتحسن