ما تدوسش على نملة

اول حاجة كنت باستغرب لها وانا صغيرة في الحج انك ما تموتيش نملة ولا حشرة يعني ايه دخل ده في اني ازور بيت الله الحرام
ايوة ممكن بلاش صيد علشان دم مثلا او قتل مثلا لكن الحشرة في الغالب بتكون مؤذية ووجودها جنبي مش مطلوب ولما كبرت وعرفت التوازن الطبيعي وان كل حاجة ربنا خلقها في الكون لسبب وعرفت ان كل ورقة بتقع من شجرة ربنا عارف رايحة فين حسيت ان الحج ده لازم نتعلم فيه التوازن الطبيعي والحفاظ على البيئة ونعتبر نفسنا جزء منها بكل ما فيها
تاني حاجة حسيت ان المكان المقدس والوقت المقدس بيعطوا امان حتى للحشرات
سبحان الله
اكتر حاجة بتخليني انبهر واقعد ساعات افكر واشكر واحمد هو نعمة التوازن الطبيعي وان كل حاجة ربنا ما خلهاش تزيد عما قدرها لها والا كان زمان الحشرات ملأت الدنيا وبوظت العالم
قبل المبيدات كان فيه توازن طبيعي واحنا اللي بنبوظه
شفت برنامج في الناشيونال جيوجرافيك بيقول ان في مزرعة معينة كانوا عايزين يحاربوا حشرات بدون مبيدات وفي الاخر وصلوا انهم ربوا خرفان في المزرعة اللي جنبهم وكانت الخرفان السبب في ان بعض الحشرات اللي بتتعايش معاها هي في الاصل عدو للحشرات اللي بتبوظ الزرع
سبحان الله العظيم