ايقونة الصبر

فيه ناس بجد باقول ربنا بيحبها قوي لدرجة انها عايشة في اختبارات لا يطيقها اغلب البشر وعلى وجهها الابتسامة والرضا
الناس دي باصغر قدامهم وبابقى مش عارفة اعمل ايه
الحل عادة بيكون دعم مادي لكن انا باحاول كمان ادعم معنويا
حاكيلكم على اسرة والاسرة دي اعرفها من اكتر من ثلاثين سنة والحمد لله اللي باقدر عليه باعمله معاها ولكن انا مش عارفة ازاي لغاية دلوقتي الست دي بتبتسم
انا حاساها شبه سيدنا ايوب
نفسي مرة تنزل برجلها تغتسل وتخف هي وجوزها وابنها وبنتها
مامتها وباباها عايشين في اوضة وحمام مشترك وكان باباها بيصلح ساعات الله يرحمه وعنده عربية صغيرة كدة ومامتها كل ما تجيب بنت توديها تشتغل في بيت من سن اربع خمس سنوات
هم خمس بنات وولد
الولد جاء بعد ما طبعا ربنا بعت ست بنات للدنيا كلهم في حالة من العذاب
الاولى ربنا معافيها ومعاها اولادها
التانية عندها سل
الثالثة عندها روماتيزم في القلب
الرابعة اولادها عندهم شيزوفرينيا لانها اتجوزت قريبها
الخامسة ربنا معافيها في جسدها بس شخصية زبالة
الولد عنده كارو وعايش عليه
الست اللي باتكلم عليها طبعا نومة المطبخ على الارض ايام ما كانت الشغالات في كل بيت وكانت قاسية عليها وجالها حمى روماتيزميه قلبت على روماتيزم في القلب وبقت تعبانة
جوزوها حتة راجع قاسي وما عندوش شغل ويضربها ويشغلها في البيوت وجابت بنتين وولد
لما دخلت حياتي وجبتها تشتغل معايا صعبت علي لان صحتها تعبانة واستمرت المساعدة بلا عمل ولكن كانت في حياتي دايما
بمساعدة اهل الخير غيرت لها الشقة لانها كانت بدرون رطب واولادها كانوا هم عيانين من الرطوبة
جبنا لجوزها شغل بس في الحكومة في قطاع تعليم الكبار بمبلغ تافه
علمت البنات والولد
الولد الكبير دخل الجامعة كلية الاداب وقعدت تحكيلي الامال اللي حطوها عليه انه حيشيل العيلة وحيبقى مدرس كبير وعنده مركز للتعليم وكلام من ده وفؤجيء طبعا انه بعد ما اتخرج مش لاقي شغل
هي مربياهم مؤدبين قوي وعندهم عفاف يعني كان لما يجيله شغلانة بعيد عن بيته وفيها تعامل مع ناس نظيفة يتكسف علشان يقولك حاروح بشبشب والا جزمة وحشة والمهم انهم طلعوا عندهم قلة حيلة قوي مش بيتحركوا بسهولة وعندهم شعور بالنقص الشديد
البنتين اتعلموا في المدارس واحدة ممرضة واتجوزت الحمد لله واحد مهندس وبيحبها وجاب لها بيت واتجهزت والدنيا نورت معاهم وحتى مسمية بنتها على اسم بنتي
ودي السعادة الوحيدة في حياة الاسرة دي
البنت الاكبر اتخطبت 4 سنوات والراجل يتأمر يمين وشمال ويخليها تتنقب ويقعدها ما تشتغلش وفي الاخر بعد ما جهزوا كل حاجة لان الام كانت مركزة على الولد وكان كل الفلوس للكلية فالتأخير كان مش مضايقهم لكن اللي حصل بسبب اني اعطيتها ستاير جديدة حلوة واشترت بثمن الستاير سجادة ام الراجل فركشت الجوازة علشان ما اخذوش رأيها في السجادة وسابها
قلت اساعدها وتشتغل معايا البنت ولكن الراجل رجع تاني بعد ما نفسيتها كانت اتدمرت وطخنت وبقى وزنها اكتر من 130 كيلو
لما وافقت ترجع له على اساس انها واخدة عليه وسامحته الام تدخلت مرة تانية وقالت له الست دي طخينة وحتتعبني ومش حتعرف تساعدني ولتاني مرة خذلها وسابها
خلال الفترة دي الولد اتقهر ومش عارف يساعد امه المريضة وعائلته فطبعا دمر نفسه وجاءت له امراض مناعية بتاكل في مصارينة يعني المصارين دايما تنزف دم ودايما عنده امغاص ودخل في دوامة مع الاطباء وعلاج جهاز المناعة ده اصلا دلوقتي بقى مشكلة
كل ده كان بيتحل لانه كان فلوس لكن المشكلة في النفسية
حاولت العب على اني اخليه يشتغل من البيت علشان يدخل له اي قرش وخصوصا ان موضوع المناعة مش بيخليه حتى يشتغل لانه محتاج الحمام دايما
المهم ان جاء للبنت التانية عريس وغالبا هو عارف ان عندها جهاز كان حاطط عينه عليه واتجوزها في شهر وفرشت البيت احسن فرش وخصوصا ان كان فيه حاجات كتيرة متحوشالها من اللي هي
بعد ما فرش البيت وحملت منه في توأم بدأ يزمزق
دي طخينة
دي تعباني
ربنا اختصر التوأم بقى طفل واحد وبنت
راح مرجعها لمامتها وقال لها مش عايزك ولا عايز البنت
الام تضحك وتقول لي جوزناها تتاخر وهات يا ضحك على انها طخينة والبيت الهواء قل وانا كنت اضحك معاها وقلبي بيدمي
قلتلها ولا يهمك ربنا حيشيل معاكي الليلة وهو غالبا بيوفر ثمن المتابعة و حيرجعلك بعد ما تولدي علشان مش عايز يصرف
ولدت وفضل مش عايزها وقالها ابريني واسيبك وانا رفضت قلتلها لا تاخدي منه حاجتك لانه استفزني قوي لكن اقول ايه
الايام دي بقى زيادة فرط اللذي وزيادة الاختبار وقهرة القلب
البنت المولودة عندها ثقبين في القلب
واحد عادي والثاني بين الاذين والبطين وبالتالي بيدخل دم فاسد والدكاترة قاولوها لازم نتسني البنت لسة عندها اربعين يوم ويمكن تعمل عملية
والام جالها جلطة في رجلها من تحت لركبتها واتحجزت بسرعة في مستشفى مش عارفة اسمها ايه لان هي جريت بيها على دكتور راح الدكتور قال لها تنزل المستشفى حالا ما تتنقلش الميري مفيش وقت الجلطة متحركة وممكن في النقل تموت
البنت دلوقتي في مستشفى الدكتور بيقول لها
حتطولي عندي
الساعة دي لقيت الام يأست ولسة حتعيط
قلتلها لا مش دلوقتي تعيطي كنتي عيطي زمان
انا بقى كنت ساعات باخد منها الشعور القوة
ما مش بابقى عايزة ايقونة الصبر دي تنهزم
قالتلي وشي في الارض كل شوية مصاريف وباتعب اللي حوالي
قلتلها لا دي مش مصاريف
دي رزقك هو جاي بس بشكل مختلف
دي فلوسك يا حبيبتي ربنا موزعها علينا بس وبيشوف مين فيها اللي حيصرفها
قلتلها احنا اللي محتاجين لان الفلوس دي بتاعك عندنا لو مكانش تاخديها تولع فينا
قلتلها اصبري زي ما صبرتي وكل حاجة حتتصلح ان شاء الله
قلتلها مجدي يعقوب بيعمل عمليات ببلاش وممكن حفيدتك تبقى زي الفل لو ربنا اراد وترجع احلى من الاول
قلتلها اصبري وانا مش عارفة لو كنت مكانها هل كنت حاصبر والا كان ممكن اليأس يأكلني
دي قصة صراع في حياة مصرية للاسف موجودة باشكال مختلفة