لا تلعب على عدم الامان للاطفال

من انتم
طبعا لما قلت للناس في الملجأ اني ماشية كانت بالنسبة لهم صدمة لان بقالي سنين وطلع من تحت ايدي عيال وكان المفروض انهم متوقعين انهم يمتصوني وهاتي بياضك يا شابة واحنا اللي نعمل بالذات ان كان فيه الورشة بدأت تطلع شغل حلو والشئون الاجتماعية بدأت تشوف نشاط للجمعية وحتى انهم اخذوا اللوحات وراحوا يعطوها للاسر المنتجة علشان تبيعها وشوية شغل حلو كدة
المهم ان امين الصندوق قال لازم نشوف حتاخدي وايه وتسيبي ايه ومكانش عندي مانع اسيب كل حاجة بس المهم ان الاولاد ما يشعروش بالتهديد المستمر انهم حيمشوا لان ده كان اسلوب الادارة ان اللي يعمل مشكلة يقولوله حنمشيك من عندنا وده منتهى عدم الامان
يعني الطفل لازم ما يتهددش بحاجة فيها عدم امان لان ده اسلوب خطر يخليه دايما شاعر ان ما بين السماء والارض
مهما كان الطفل بيعمل لازم تبلغه ان اللي بتعمله ده هو حب حتى القسوة حب حتى الزعيق حب احنا بنحبك علشان كدة خايفين عليك وكل ما نحبك ونخاف اكتر كل ما تلاقينا بنزعق اكتر وانا سبب اني سبت المكان ان لقيت اني فقدت الخصوصية اللي كنت فيها وهي اني مع الاولاد وبس وبقيت مع مجلس الادارة اللي كل انجازاته اي فتش في اي هجص
دخولي مع مجلس الادارة كان هو السبب في خروجي من المكان
يوم ما قلتلهم انا ماشية رحت رايحة لوكيل وزارة الشئون في منطقة الدفاع الاجتماعي وقلتله انا عايزة اعمل نشاط مع الاحداث وبالذات بعد ما عديت على الولد لقيته بيعيط عياط متصل وخايف ومرعوب وده كان بعد اكتر من خمس سنوات عشرة مع بعض وبالتالي ما قدرتش اسيبه
وكيل الوزارة قال لي تعالي طبعا وانا حافضيلك ورشة واعملي الموزاييك عندي ما يهمكيش وبالفعل رحت معاه لقيته اخذني على ورشة كبيرة قوي وكلها ماكينات بتاعة الومينيوم الظاهر يعني منشار وحاجات كدة وقال لي حافضيهالك قلتله من بكرة حاكون عندك