الدم ما بيبقاش ميه

-


ذكرياتي 64
بعد كل المذكرات المكتوبة لازم نتفق على حاجة و هي ان انا نتيجة ذكائي الخارق الغير عادي فله آثار جانبية وهي ان انا مدهولة في اوقات كتير و دي مش شتيمة ولكن دي نتيجة ان مخي بيروح في حاجات اكبر من اني احافظ على مصروفي أو اعرف انا حطيت الفلوس فين لما ماما قالت لي روحي حطيها في الدولاب
ونتيجة لحالة الغيبوبة المستمرة فمصروفي كان بيتوه مني اول يوم اخده ، ممكن افتكره ورقة وارميه على الرغم من ان المناديل زمان كانت قماش مش كلينكس ، فما بال لو المناديل كلينكس كان زمان كل حاجة ضاعت مني حتى ورقة الجلوس بتاعة الثانوية العامة و حياتكم
اهم حاجة في الموضوع ده انك تداري الوضع ومحدش يعرف انك رميت المصروف في اول زبالة، أو انك عطيت الفلوس بالغلط و بدل الجنيه اعطيت العشرة
وبناء على ما سبق فانا بعد يومين من الشهر بابقى على الحديدة واسال ماما لو ممكن تديني ملحق للمصروف و مرة توافق و مرة تعترض وفي الآخر اصبح الوسيلة هو التهديد و الوعيد وانا بقى مش باقصد ارميه او اضيعه ، ولكن ذكاء خارق اعمل ايه بقى
في يوم من ذات الايام وبعد ما رجعت من المدرسة ، و الظاهر ان ماما كانت حاسة ان مصروفي ضاع فلقيتها بتقول لي
روحي هاتلنا ايس كريم من تحت
استنيت تديني الفلوس
صمت
صمت
صمت
انا قلت لك روحي هاتلنا ايس كريم من تحت
صمت
ادفعي من مصروفك وانا حاديكي ياللا روحي بسرعة والا مصروفك ضاع
وششششششششششششش
صوت نتيجة اندفاعي الشديد لخارج الاوضة قبل ما تسألني عن المصروف
رحت لاخويا الكبير الجميل اللي لازم يقف معايا في المواقف دي
ممكن تسلفني اجيب ايس كريم و ابقى ارجعلك الفلوس لما اقبض
بص لي وقال
اطلبي مني بادب و قوليلي
انت ملاذي الوحيد ، انا من غيرك ما اسواش حاجة
وانا كنت مراهقة بقى وشخصية بقى و مش عايز اصغر نفسي
صوت ماما في الخلفية .....انت نزلتي والا لسة
رحت قلت بسرعة شديدة
انتملاذيالوحيدانامنغيركمسوشحجة
قال لي و بالراحة جدا
لا .... صمت .... لا ...
بالراحة وتعنيها
رحت قلت بالراحة و الدم بيغلي و يفور
صوت ماما في الخلفية .... انت فين
انت ملاذي الوحيد ، انا من غيرك ما اسواش حاجة
يقول لي
يا ريت تنزلي على رجل و تقوليها وانت على ركبتك
اتنرفزت وقلت انا حاقول لماما ان مصروفي ضاع وخلاص بدل الذل ده
طلعت من الاوضة وسمعت ماما
انت فيييييييييييييييين
رجعت و ركنت على ركبتي
انت ملاذي الوحيد ، انا من غيرك ما اسواش حاجة
مش حاطول عليكم لكن هو اصر ان انا اقولها بالراحة واعنيها و لما وافق على الطريقة اللي قلتها قال لي :
انا آسف معيش فلوس انا خلصت مصروفي
آآآآآآآآآآآآه ه ه ه ه
طلعت لماما وطبعا وشي احمر مزنهر من النرفزة و نفسي مقطع و عيوني كلها دموع وقلت لها
انا مصروفي ضاع
صعبت على ماما و قالت لي
ما قولتيش ليه
خذي الفلوس اهيه
ورحت جري اشتريت الايس كريم و اتصالحت مع اخويا بعد 3 سنوات تقريبا وده لان الدم ما بيبقاش ميه بس

تعليقات

  1. Amal24 مارس 2010 في 3:55 م

    و الموضوع ده إستمر لحد إمتى ؟؟؟

    أنا برضو كنت باتوووه حبتييين و كنت بحط ريمووت التليفزيون في التلاجة و البييت كلوو يقعد يدور :))))

    ردحذف
  2. cocca hanem26 أبريل 2010 في 1:19 ص

    الموضوع ده الى الآن ، ده انا كمان سألت دكتور على السبب هل هو تصلب شرايين او الزهايمر و لكن هو قال لي بعد تفكير عمييييق
    انت بس مخك مشغول

    ردحذف

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد