الاسنان نعمة ربنا بيديهالنا علشان نستخدمها

-


ذكرياتي 63
الاسنان نعمة ربنا بيديهالنا علشان نستخدمها ، مش علشان نركنها ، وانا باعبد ربنا خير عبادة و بالتالي لازم احمده على نعمة الاسنان و استخدمها و بما اني الظاهر اطفطمت بدري فباحب ملمس الكاوتش بتاع التيتينا والا حاجة
من الآخر انا عضاضة و كنت باعض معظم قرايبي و اصحابي و لما كنت باغير اسناني كان السنتين اللي قدام عاملين زي صباع الربسوس الاسود و لما قالولي ده سوس بطلت آكل الربسوس سنين طويلة لاني ربطت السوس بالربسوس
كان اولاد خالتي 9 وانا في وسطيهم اعض و اقول العملية حتسيح بين القبائل و ممكن اي حد يلبس فيها و انا في السليم ولكن اسناني كانت بتفضحني لان عندي السنتين الأولانين كانوا مسوسين و بالتالي مكان العضة بيبقى خرم و الاسنان اللي جنبها بيبقى شرطة يعني زي مورس كود كدة

-..-
ولو الانياب بانت يبقى كدة
.-.-.
و الناس التانية كلها كدة
----
علشان اربع اسنان سليمة
وبالتالي مش ممكن اهرب بعضتي من العقاب
مرت سنين وانا الرغبة في على الرغم من اننا و الله عمري ما رحت افلام دراكيولا لحسن استلذ طعم الدم و تبقى مصيبة بقى
وبعد سنين طويلة كنت نايمة جنب اختي حبيبتي و لقيت دراعها جنبي وكنا بعد الظهر في لحظة روقان و عمالين نضحك و انا دراعها جنبي و اقول استعيذي بالله من الشيطان
و نكمل الكلام و انا مش قادرة نفسي اعضها ، بس عمري كان اكتر من 16 سنة ، يعني راكزة و عاقلة ومحدش حيسيبني ، و فضلت ماسكة نفسي و في الآخر قلت اتكلي على الله وقوليلها
ممكن اعضك لو سمحتي
قلتها بطريقة لطيفة بحيث انها لم تشعر بالتهديد و افتكرت اننا حاعض بالراحة
فقالت بدلال
ممكن
وما كدبتش خبر وهم هم هم
عضيت و هي تصرخ وانا مكملة ، وفي النهاية شدت ايدها مني وقالت لي
بتعملي ايه
قلت لها انا سألتك الأول
قالي لي بس مش كدة
المهم ان الموضوع ده اتكرر مع والدي العزيز وهو قاعد جنبي و مبسوط وانا مبسوطة اكتر منه وايده جنبي شكلها مغري جدا وانا نفسي اهبرها
وبرضة سألته نفس السؤال البرئ
ممكن اعضك
قال لي باستسلام
لو اهون عليكي
وانا اعتبرها مش لأ
وغرزت اسناني في دراعه وهو مش مصدق نفسه
وعلى الرغم من انه الوالد ، لكن برضة عضيت بذمة و انتهت انه خاصمني و انا ابرر
انا سألتك
وهو يرد انا قلت لو اهون عليكي و ما تخيلتش اني حاهون
انا
دلوقتي باكل لحمة و بطلت عض خالص
مش علشان اسناني تعبت و لا علشان كبرت على كدة
لكن علشان الكوليسترول

تعليقات

  1. Unknown28 نوفمبر 2016 في 1:44 م

    ههههههههههههه جرام عليكى يا مفتريه
    عارفه لو انا جنبك كنت خليتك تعضينى انا
    بمزح طبعا هههههههه

    ردحذف

إرسال تعليق

المشاركات الشائعة من هذه المدونة

علامة الاذن التيسير

-
  انا جربتها ونفعت احاول ايسر للناس فربنا ييسر لي احاول اعطي للناس فربنا يعطيني احاول افيد الناس فربنا يجعل لي فائدة في كل شيء بس الكلام ده على مدار عمري بس مش في ساعتها علشان تفهموني صح ولازم تكون النية لله خالصة ما استناش هي بتيجي لوحدها والتيسير من عنده ولما ييسر حاجة بادوس على طول ولو متكعبلة باستنى لغاية لما تتيسر علشان علامة الاذن التيسير ولو متكعبلة ما باعتبرش انها غضب من ربنا بالعكس باقول اكيد العقبة دي علشان اتعلم حاجة لما بعد ذلك ما هو اللي في ابتدائي مشكلته يفتكر الحروف واللي في رابعة مشكلته يحفظ جدول الضرب واللي في اعدادي مشكلته يفتكر تاريخ معركة الاناضول واللي في ثانوي مشكلته في الكيمياء والا الفيزياء وكل ما يكبر علمك كل ما تحدياتك بتزيد وعلشان كدة كل ما المشاكل بتكتر كل ما الحكمة بتزيد ما تستعجلش النعمة لانها جاية جاية غصب عنك بس في وقتها
قراءة المزيد

يجب التمهيد لوجود برص في البيت

-
انا ام مثالية ده موضوع مش بنتناقش فيه ده بنعرفه وعشان انا ام مثالية يبقى مش لازم اتخض وافزع قدام الاولاد لان ده معناه ان الاولاد حيتعلموا يخافوا واكم من ست كانت بتخاف من القطط اولادها طلعوا جبناء وبيخافوا هم كمان وبالتالي اي منظر مفزع لازم اتأنى وافكر قبل ما اصرخ او اتخض وعلشان كدة لما وصلنا اول يوم في سلطنة عمان ونمنا في البيت بتاعنا وتاني يوم صحيت من النوم وبافتح الستارة في اوضة السفرة لقيت برص واقف على الزجاج من الناحية التانية ولازق بطريقة مقززه وشكله بجد مقرف ومخيف في نفس الوقت وبالتالي شهقت شهقة كبيرة جابت اولادي من آخر البيت وهم بيقولوا فيه ايه يا مامي مامي كانت اول مرة تشوف برص هي كانت محترفة سحالي في بيت اهلها زمان في الجنينة بتاعتهم لكن برص ده كان جديد وشه مختلف ولونه شبه شفاف يااااع ولكن بما انكم عارفين ان انا ام مثالية فرديت على الاولاد بالآتي الله ياولاد شفتم ده برص الاولاد بصوا على البرص على الزجاج من الخارج ووقفوا يتأملوا رجلين وديل والغريبة انه وقف كدة بتاع ساعة وانا مقشعرة واروح وآجي اطلع اللي في شنط السفر وارتب الحاجة وهم واقفين بيبصوا عليه بعد شوية سمعت بنتي ب
قراءة المزيد

الانسان تاريخ

-
  الانسان تاريخ طول حياتي باتعامل مع الناس وانا مخي دفتر كل ما اشوف حد بيقول لي على حاجة او بيعمل حاجة بتكون علامة في حياتي اتعلمت كتير من دروس كتير ومن ناس كتير حاشارك معاكم اللي اتعلمته تعلمت من ابي ألا أكذب لانه لم يكذب امامي تعلمت من امي ان اعطي مما احب لانها كانت تعطي امامي تعلمت من اخي الوقوف مع الضعيف لانه كان يساند اصدقاءه امامي تعلمت من اختي ان الموضوعية وألا احقد على احد وكنت اشعر بها امامي تعلمت من زوجي ألا أعطي إلا إذا اردت لانه كان يعطي عندما يريد تعلمت من ابني الا اتعجل ادواري التي اقوم بها لانه لم كان لا يستحث الوقت على المرور تعلمت من ابنتي ان احب الجميع ولكن في العمل الحرفية هي الاساس تعلمت من البواب ان اسامح من عاصر يوما عصيبا ومن منا لم يمر به تعلمت من جارتي ان الحب لا ان تري حبيبك ولكن ان تشعري به تعلمت من استاذي ان العلم لا ينتهي تعلمت من البقال ان الحرص يغني وان الغفلة تطمع الاخرين تعلمت من النشال ان ما يضيع منك لا يغيظك ثمنه ولكن يغيظك استغفال الحرامي لك تعلمت من الشباب ان الرعونة لها ثمن ولكن درسها اكثر من اي ثمن تعلمت من الرض
قراءة المزيد